Diyarname

Kovara France Football her sal xelata "Ballon d'Or" dide lîstikvanên fûtbolê yên herî serketî yên li Ewropayê dilîzin. Xelata îsal di warê mêran de Lionel Messi girt. Li dinyayê ku "7 mikemelên dinyayê" hene, lê Messi bû 8 caran vê kûpayê digire û êdî ew "8'emîn mikemelê dinyayê" ye. Di warê jinan de jî lîstikvana Barselonayê Aitana Bonmati girt.

Li gor saeta Ewropa êvara 30'ê mehê merasima xelatdayînê li Thêatre du Chatelet ya li Parîsa Fransayê li dar ket. Lîstikvanên navdar li merasimê bûn. Merasim heta nîvê şevê dom kir. Lîstikvanê navdar Messi (Inter Miami/PSG) lîstikvanên wekî Erling Haaland (Manchester City) û Kylian Mbappe (PSG) li dû xwe hiştin û xelat girt.

Messi par di lîga Fransayê Ligue 1 de ligel PSG'ê, di Kûpaya Cîhanê ya FIFA'yê de jî ligel tîma xwe ya neteweyî Arjantînê bûbû şampiyon û kûpa girtibû. Ev serketin kir ku Messi carek din vê xelatê bigire. Bi vê serketinê re Messi bû 8 caran vê xelatê digire. Piştî wî Ronaldo tê ku wî 5 caran ev xelat girtiye.

Messi di maçên Kûpaya Cîhanê de 7 gol avêtibû û 3 asîst pêkanîbûn. Bi vê yekê pareke mezin a di serketina kûpayê de ê wî bû. Dema Messi xelata xwe girt hemû temaşevan rabûn ser piyan û jêre li çepikan dan. Messi xelata xwe ji destê lîstikvanê berê David Backhem ku niha jî wekî xwediyê Inter Miami patronê wî ye girt. Messi wisa got,  "Di vê xelatê de keda mezin a hevalên min ên tîmê heye. Di tîma neteweyî de me bi hev re serketinek mezin bi dest xist." Jin û zarokên Messi jî di merasimê de bûn. Di dema xelatgirtinê de her sê kurên Messi jî çûn ser dikê û bavê xwe pîroz kirin.

DÎROKA BALON D'ORÊ

Ballon d'Or ji sala 1956'an ve tê dayîn. Di sala 2010'an de France Fotbolê û FIFA'yê li hev kirin ku bi hev re vê xelatê bidin û ev li hev kirin heta sala 2015'an dom kir, lê ji 2016'an û vir de kovara Football France dîsa bi serê xwe vê xelatê dide. Par (2022) lîstikvan Karim Benzema (Real Madrid) ev xelat girtibû.

LÎSTIKVANA SERKETÎ: AITA BONMATI

Li aliyê din di warê fûtbola jinan de jî ev xelat tê dayîn. Îsal lîstikvana Barselonayê Aitana Bonmati wekî lîstikvana herî serketî ev xelat girt.

Xelata Tîma Jinan a Herî Serketî jî dan tîma Barselonayê. Barselona, îsal di Lîga Şampiyonan a UEFA'yê de bûbû şampiyon û bi vê yekê ev xelat girt.

Ji bilî van xelata Lîstikvanê Ciwan ê Herî Serketî dan Jude Bellingham (Real Madrid), Xelata Socrates jî dan Vinicius Jr. (Real Madrid)

Xelata Lev Yaşin a Qeleparêzê Herî Serketî dan qeleparêzê Aston Villa Emiliano Martinez û Xelata Forvetê Herî Seretî jî dan Erling Haaland (Manchestir City).

MC JÎ HAT XELATKIRIN

Her wiha xelata Tîma Herî Serketî ya Salê jî dan tîma îngilîz Manchester City (MC). MC par ligel Premier Lîgê, di Lîga Şampiyonan de jî bûbû şampiyon û yekem car ev kûpa biribû mala xwe.