NAVENDA NÛÇEYAN

Li 15 parêzgehên Iraqê hilbijartin çêbûn, piştî vê waliyên hemû parêzgehan hatin diyarkirin lê hê jî encumenan waliyên Kerkûk û Diyaleyê hilnebijartine.

18'ê berfanbana 2023'yan de hilbijartin çêbû. Bi ser re 2 meh derbas bûne. Li 13 parêzgehên Iraqê serê vê mehê aliyên siyasî hatin ba hev û ji nav xwe walî hilbijartin lê li Kerkûk û Diyalayê hê walî nehatiye hilbijartin.

Waliyê bi wekalet yê Kerkûkê Rakan Cibûrî bi daxuyaniyeke fermî ji hemû endamên encumena parêzgeha Kerkûkê re ragihandibû ku wê roja 5’ê reşemiyê civîna yekem a encumenan li dar bixe, lê civîn hat betalkirin, walî û serokê encumenan nehat diyarkirin.

Roja 5'ê mehê encumenên kurd û yên xiristiyan li civînê amade bûn lê encûmenên ereb û tirkmen ku heft kursiyên wan hene beşdarî civînê nebûn. Ji ber ku rêjeya yasayî ya endamên encûmenê temam nebûn, civîn ji bo demek nediyar hate taloq kirin.

Yekitiya Nîştimaniya Kurdistanê (YNK) li encûmena parêzgeha Kerkûkê 5 kursiyan bi destxist û xwediyê deng û kursiyên herî zêde ye. Yê PDK'ê 2 kursiyên wan hene. YNK postê waliyê Kerkûkê mafê xwe dibîne. Di nava çend rojên borî de YNK û PDK’ê di derbarê postê waliyê nû yê Kerkûkê de kombûn. Di dawiya civînê de her du aliyan bi daxuyaniyek hevbeş ragihandin ku her du alî hemfikirin ku kurdek ji bo postê waliyê nû yê parêzgeha Kerkûkê were hilbijartin. Lê hê jî negihîştine encamê.

Piştî civîna her du aliyan, Berdevkê Lîsteya Hevpeymaniya Ereb Ezam Hemedanî ragihand ku li gel PDK’ê lihevkiribûn ku postê waliyê Kerkûkê ji bo ereban, cîgirê walî ji bo PDK û serokê encumenê jî ji bo tirkmenan bihata dayîn û got: “Li beramberî lihevkirina PDK’ê ya li gel YNK’ê matmayî mane.”

Li gorî encamên dawî yên komîsyonê, kurdan li parêzgeha Kerkûkê 7 kursî bi dest xistine. Pêkhateya Ereb 6 kursî û pêkhateya tirkmen jî 2 kursî bidest xistine û kesîhiyan jî bi kota kursiyek bidest xistiye.

Ji sala 2017’an ve postê walîtiya Kerkûkê ji aliyê Rakan Cibûrî ve wekî wekalet tê rêvebirin

LI DIYALAYÊ LI HEV NEKIRIN

Encûmena parêzgeha Diyale jî piştî lidarxistina du civînan, ji ber hinek sedemên cuda nekarîn kesek wekî walî diyar bikin. Tê payîn ger alî li ser postê walî lihevnekin, ev mijar dê heta Dadgeha Federal biçe.

Di 5’ê reşemiyê de yekem civîna encumena parêzgeha Diyaleyê hate lidarxistin, lê ji ber hevrikiya tund a di navbera her du lîsteyên Siyade û Teqedûm ya ji ber diyarkirina postê encumenê parêzgehê de, ji bo demeke nediyar hat paşxistin.

Li gor nûçeya Rojnewsê biryar ew bû ku 11'ê mehê carek din encumena parêzgeha Diyaleyê ji bo diyarkirina walî û cîgirê wî kom bibe, lê tenê 6 endam beşdarî civînê bûn. Ji ber kêmbûna rêjeya yasayî civîna encûmenê carek din ji bo demek nediyar hate taloqkirin.

Bi giştî 15 kursiyên encûmena parêzgeha Diyale hene ku partiya Teqedûm 3 kursî, partiya Siyade 3 kursî bi destxistine. Di navbera her du partiyan de li ser girtina postê waliyê parêzgehê pirsgirêk hene. Ji ber wê heta niha nekarîne walî û cîgirê wî diyar bikin.