Diyarname

Polîsên Belçîkayê şeva çûyî saet dor yek û nîvê şevê bi ser kanalên televîzyonê yên kurdî de girtin. Polîsan zirar da kablo û kompîturan.

Saet yek û nîvê şevê li dor 200 polîsên Belçîkayê bi ser studyoyên Stêrk TV û Medya Haber TV de girtin. Polîsan dor 4 saetan lêgerîn pêk anîn. Di encamê de polîsan kabloyên weşanê qut kirin û zirar dan kanalê.

Li Belçîkayê studyoyên Roj NV, Sterk Production û kompaniya Hîvron hene ku ev ji bo Stêrk TV û Medya Haber TV xebatê dikin. Polîsan bi ser vir de girtin, odeyên wan tevlihev kirin, kablo qetandin.

Li ser vê yekê xebatkarên televîzyonê vê sibê bi çend zimanan daxuyanî dan çapemeniyê. Di daxuyaniyê de hat gotin ku di dema xebatkarên wan ne li wir bûne, bêyî agahiyê bidin parêzerên wan derî şikandine, ketine hundir, zirar dane amûrên wan ên weşanê. Wisa hat gotine, "Heta niha lêkolînên li ser xebatên me hatine kirin, dozên hatine destpêkirin hemû bê encam bi dawî bûne, kompaniyên me rastî tu cezayan nehatine. Her wiha kompaniyên navên wan derbas bûn li gor zagonên Belçîkayê xebatên xwe dikin, saziyên bazirganî ne û heta niha tu ceza li wan jî nehatiye birîn."

Di daxuyaniyê de hat gotin ku ev êrîş li hemberî çapemeniya azad a kurdan û mafê agahîgirtinê ya kurdan e û bang li raya giştî ya Belçîkayê hat kirin ku dengê xwe derxe.

'EMÊ HETA DAWÎ MAFÊN XWE BIPARÊZIN' 

Di daxuyaniyê de got ku ew xebatên çapemeniyê dikin û wisa dom kirin, "Xebatên me eşkere ne, deriyên studyoyên me ji bo her kesî vekirîne. Di serî de polîs, kî bixwaze dikare were ofîsên me û xebatên me bişopîne. Tiştek me ya veşarî tune ye. Em dixwazin bibêjin ku bêyî rayedarên kompaniyê hebin bi ser ofîsên me de girtine, ev yek komplo ye. Bêyî biryara nivîskî di destê polîsan de hebe bi ser ofîsên me de girtiye û ev lêgerînên ku hatine kirin bi ya me sûc e. Emê heta dawî mafên xwe yên hiqûqî biparêzin. Parêzerên me li hemberî vê êrîşa konsanî dê serîlêdanan bikin."

4 SAL BERÊ JÎ BI SER WIR DE GIRTIBÛN

Polîsan 10'ê adara 2010'an de jî dîsa bi ser heman studyoyan de girtibû. Wê çaxê jî polîsan dest danîbû ser kompîtur û hardîskan, di encama lêkolînê de tu sûc nehatibû dîtin