Diyarname
Fîlmê derhêner Tunç Başaran ê bi navê "Bila li Bafirokê Nexin" yek ji fîlmên klasik ê Tirkiyeyê ye. Fîlm niha hat restorekirin û wê bê nîşandayîn.
Platforma temaşekirina fîlman MUBI li ser hesabê xwe yê X'ê nûkirina fîlmî ragihand û got bi vî awayî dê bê belavkirin.
Fîlmê derhêner Başaran ji romana bi heman navî yê Feride Çiçekoglu hatiye girtin û di sala 1989'an de hatiye kişandin.
MUBÎ wisa gotiye: "Em gelek kêfxweş in ku projeya xwe ya duyemîn a restorekirinê radigihînin! Klasîka nemir a Tunç Başaran BILA LI BAFIROKÊ NEXIN, bi kalîteya 4K hat nûkirin. Ev fîlmê taybet ku di dema xwe de deng veda û gelek hat hezkirin, dê di demeke nêzîk de bi pêşkêşiya nû li ser MUBI be."
Fîlm, çîroka dostaniya di navbera Barişê pênc salî yê ku ligel diya xwe li menzela jinan a girtîgehekê dijî û girtiya siyasî Înciyê vedibêje. Fîlmê ku li girtîgehê derbas dibe di heman demê de balê dikişîne ser Derbeya 12'yê Rezberê ya li Tirkiyeyê.
Di fîlmê Başaran de Ozan Bilen, Nur Surer, Fusun Demirel, Guzin Ozipek, Guzin Ozyagcilar, Meral Çetinkaya, Rozet Hubeş û Yasemin Alkaya dilîzin.
Wê çaxê Tirkiyeyê ev fîlm ji bo pêşberendamtiya Oscarê şandibû ber destê Akademiyê.
Di 26'emîn Festîvala Fîlman a Porteqala Zêrîn a Antalyayê de xelata Fîlmê Herî Serketî, Lîstikvana Herî Serketî, Senaryoya Herî Serketî jî têde 5 xelat girtibû.