Diyarname
Kûpaya Dinya ay FIFA ay 2026'inan emsar DYA, Meksîka û Kanada de yena kaykerdişî. 48 tîmê welatan ke go şorê Kûpaya Dinya eşkera bî.

Emsar reya 23'inan a ke ene tûrnûva yena viraştişî. Reya yewinan a ke ene tûrnûva bi 48 tîman yena viraştişî. Verî 32 tîmî şîne kûpa, emsar ene hûmare kerde 48. Henî tîmî di maçanê kaman de verî eşkera bîbî, ê mendî zî eno hefte bi maçanê play-offê eşkera bî. 

Di tûrnûva de 12 komî estê, her kome de 4 tîmî estê. Her kome de 3 maçî go bêrê kaykerdişî. Tîmê bibê yewîn û diyin raste rat şinê tûrek bîn ke enî kenê 24 tîmî. Di koman de 8 tîmên di rêzey hîrinan de ke bi pûanê xwe tewr başê zî şinê dewreyke bîn; bi temamî 32 tîmî, zey "Dewrey 32'yinan" go kay bikerê. 
Di Dewrey 32'yinan de maçêke tenî yena kaykerdişî, 16 tîmê bi ser bikoy derbasê Dewrey 16'inan benê. Di ene dewre de zî 8 tîmê bi ser bikoy şinê çarîk fînal. Bi eno awa dimara nîm fînal û dimara fînal yeno.

Ê komî û tîmên miyanê koman de bi eno away viraziyayê:
- Koma A: Çekya, Meksîka, Afrika Başûr, Koreya Başûr
- Koma B: Kanada, Bosna-Hersek, Qetar, Swîsre
- Koma C: Brezîlya, Fas, Haîtî, Skoçya
- Koma D: DYA, Paraguay, Avustralya, Tirkiye
- Koma E: Almanya, Curaçao, Qeraxê Ajî, Ekvador
- Koma F: Hollanda, Japonya, Swêd, Tûnûs
- Koma G: Belçîka, Misir, Îran, Zelandaya Newî
- Koma H: Spanya, Giravên Cape Verde, Erebistana Siûdî, Ûrûgûay
- Koma I: Fransa, Senegal, Iraq, Norwec
- Koma J: Arjantîn, Cezayîr, Avusturya, Urdun
- Koma K: Portekîz, Komara Demokratîk ay Kongo, Ozbekistan, Kolombiya
- Koma L: Îngilistan, Xirvatistan, Gana, Panama.

Tûrnûvaya emsarî rocê 11'ê hezîranî de bi maçey Meksîka û Başûrê Afrîka dest pa kena û 19'ê temûzî de bi maçey fînalî go temam bibo.