Diyarname
Piştî êrîşa Dewleta Tirkiyeyê ya li ser Serêkaniyê bi hezaran kurdan ji wir bar kiribû. Îro koma pêşî vegeriya Serêkaniyê.

Piştî 9 salan 410 malbatên ji Serêkaniyê îro bi weseîtan vegeriyan cih û warên xwe.

'KEÇA MIN JI KÊFAN XEW NEKIR'
Hinek koçberên ji bo ANHA'yê axivîne wisa dibêjin:
Mihemed Hisên El Elî: "Em nikarin kêfxweşiya xwe bi lêv bikin. Keçeke min a biçûk heye, ji kêfan xew nekir. Veger xeyala me bû, me li koçberiyê gelek zehmetî dîtin. Em ê îro vedigerin, malên xwe lê bikin û mîna berê bijîn."

Fatma Emîn Şerîf: "Min gelekî bêriya mal û bajarê xwe kiriye. Me li koçberiyê zor û zehmetî dît û zarokên me dûrî warê xwe mezin bûn. Em bi vegerê gelekî şa û bextewer bûne. Heke baskên min hebûne, ez ê ji kêfan bifiriyama. Dibe ku mala me wêran bûye lê li pêşiya vegerê nabe asteng."

ÊRÎŞÊ GELÊ SERÊKANIYÊ KIRIN
Li aliyê din dema malbat gihîştin bajarê xwe hinan êrîşê wan kir.
Ev êrîş li Qamişlo, Hesekê, Til Temir, Dirbesiyê û gelek cihên din hat şermezarkirin.

MEZLUM EBDÎ PEYAM BELAV KIR
Fermandarê Giştî yê Hêzên Sûriyeya Demokratîk (HSD) Mazlûm Ebdî li ser X'ê peyamek belav kir. Ebdî êrîş şermezar kir û got, "Em hêrsa kolana kurdî ya li hemberî van êrîşan fêm dikin. Di heman demê de em bang li şêniyên xwe dikin ku xwe ragirin, nekevin nava kiryarên bêberpirsiyarî, saziyên sivîl û ewlekariyê biparêzin.
Em teqez dikin ku em ji bo parastina koçberên sivîl ên vedigerin, hesabpirsîna ji kesên destên wan di vî kiryarê de hene, her wiha ji bo mîsogerkirina mafên hemûyan û parastina istiqrarê, bi aliyên têkildar re dixebitin."