Diyarname
BDP'ê ji bo Zagona Bingehîn xalên xwe pêşniyar kir û ji bo ziman xwest kurdî bibe zimanê duyemîn ê fermî.

Ji bo Zagona Bingehîn a nû ya Tirkiyeyê îro partiyên li Meclisa Tirkiyeyê pêşniyarên xwe dan meclisê. Partiyên din ji bo kurdî bikeve Zagona Bingehîn tu daxwazek nekirin lê BDP'ê ev xal di pêşniyara xwe de bi cih kir.

Pêşniyara BDP'ê bi vê paragrafê dest pê dike:

"Em wekî gelê Tirkiyeyê, em di wê baweriyê de ne ku hemû kes û gel xwedî mafên mirovan ên gerdûnî û azadiyê ne. Di warê nijad, ziman, ol, mezheb, cinsiyet, meyla cinsiyetê, koka etnîkî û tiştên wisa de tu cudatî nayê kirin û di vî warî de em her kesî wekhev dibînin.
Hemû nasnameyên cuda, çand, ziman û bawerî yên li Tirkiyeyê di bin ewlehiya Zagona Bingehîn de ne. Em cudatiya hev wekî yekbûna civakê dihesibînin."

Li Tirkiyeyê herî zêde her sê xalên pêşî, meseleya ziman û azadiya bûye meseleya nîqaşê. Her sê partiyan (AKP, CHP û MHP) nexwestiye her sê xalên pêşîn ên Zagona Bingehîn a nû biguherin lê BDP'ê di van xalan de guherîneke mezin xwestiye.
Vane pêşniyarên BDP'ê yên di vî warî de

Xal 1:
( 1) Komara Tirkiyeyê li ser mafên mirovan bilind dibe, dewleteke hikûkî ya civîkî, demokratîk û laîk e.

(2) Dewlet di warê bîrdozî, ol, bawerî û şêweya jiyanê de piranîbûnê qebûl dike û li hemberî rewşa piranî ya civanê bêalî disekine. Tu bîrdozî, ol, bawerî û şêweya jiyanê ji aliyê dewletê ve nayê parastin, yan jî van nikare bigire bin wesayeta xwe.

(3) Rewşa birêvebirin a dewletê li gor "Ademi Merkeziyetçilik" (Bi îngilîzî "decentralization" û bi kurdî em dikarin bibêjin "Raye belavkirina li rêveberiyên herêmî*) tê sazkirin. Destnadin yekparebûna axa dewletê.

Sembolên Dewletê

Xal 2:
(Di vê xalê de, al, sirûd, paytext wekî ya niha parastine, tu guhartin pêşniyar nekiriye)

Zimanê fermî yê dewletê

Xal 3:
(1) Zimanê fermî yê dewletê tirkî ye. Maf û peywira hemû hemwelatiyan heye ku zimanê fermî hîn bibe.
Zimanên din ên ku gelê Tirkiyeyê pê diaxivin, bi biryara meclisên herêmî dikare wekî zimanê duyemîn ê fermî bê bikaranîn.
 
(2) Her kes di jiyana xwe ya şexsî û di saziyên dewletê de digel zimanê fermî, xwedî maf e ku zimanê xwe yê zikmakî jî bikar bîne.

(3) Dewlet xwedî erk e ku hurmetê nîşanî hemû zimanan bide ku ew zanda hevpar ên welat in, ew xwedî erk e ku van zimanan biparêze, ji bo ev ziman bên bikaranîn û pêşxistin bar bigire ser milên xwe.

Her wiha di xalên din ên hatine pêşniyar kirin de BDP'ê digel meclisa heyî daxwaza meclisên herêmî jî kiriye. Di vî warî de, di pêşniyarê de ji bo Xala 5'an (benda 2'yan) wisa gotiye. "Hemû raye di destê Meclisa Milet a Mezin a Tirkiyeyê û Meclisên Herêmê de ye."

BDP'ê ji bo peyva "Mileta Tirk" pêşniyara guherînê kir û peyva "Gelê Tirkiyeyê" bikar anî.