Stenbol

Li Stenbolê, du karkerên kurd ên li kargeheke înşaetê dixebitin, ji ber bi kurdî axivîn rastî êrîşa nîjadperestan hat û birîndar bûn. Rewşa yek ji van karkeran giran e. Karkerên li heman kargehê dixebitin gotin, "Hevalên me ji ber ku bi zimanê xwe diaxivîn û ji ber kurd in, rastî êrîşê hatin. Berî niha jî bûyerek bi heman rengî rû dabû, ev ne ya destpêkê ye."

Li gorî nûçeya DÎHA'yê, karkerên bi navê Tekîn Gungor û Mûhammed Ozturk ê li kargeha taşeron Panel Yapi dixebitîn, li cihê kar ê tesîsata elektrîkê ya Kargeha Ege Yapi Înşaat a li Îstoça Bagcilara Stenbolê, ji ber ku bi telefonê bi kurdî bi malbatên xwe re axivîn, rastî êrîşê hatin.

Bûyer şeva pêncşemê saet li dor 23.00'an qewimî û êrîşkaran piştî ku her du karkerên kurd bi kêran birîndar kirin, ew li betaniyan pêçandin û danîn ber konteynera li ber înşaetê. Piştî 40 deqeyan karkerên din hevalên xwe Gungor û Ozturk dîtin û bi ambûlansê her du karkerên kurd rakirin Nexweşxaneya Dewletê ya Bagcilarê. Piştî dermankirinê Ozturk ji nexweşxaneyê derket, lê rewşa Gungor cidî ye. (Her çiqas agahî hatibe karkerek wefat kiriye jî niha tiştek wisa nîn e).

Ber destê sibê, karkerên din ên bi êrîşê hesiyan li ber kargehê hatin cem hev û xwestin bi xwediyê kargehê re hevdîtinê bikin. Ji ber ku xwediyê kargehê nexwest bi karkeran re hevdîtinê bike, karkeran ji bo dengê xwe bidin bihîstin ber bi avahiya Kanal D ve meşiyan û piştî ku demekê li vir sekinîn, rêya Bagcilar-Mahmûtbey ji bo trafîkê girtin. Karker paşê vegeriyan qada înşaetê û bi sedema ewlekariya jiyana wan nîn e xwestin bi xwediyê kargehê re biaxivin. Yek ji karkeran Engîn Çakmak der barê bûyerê de got, "Hevalên me ji ber ku bi zimanê xwe axivîn û kurd in rastî êrîşê hatin. Berî niha jî bi heman rengî bûyerekê rû dabû. Ev ne ya yekem e."

Sekna karkeran a li qada înşaetê dewam dike. Hat gotin  ku polîsan 3 êrîşkar girtine bin çavan.