Diyarname

Mebûsê berê yê BDP'ê û Endamê Meclisa Daîmî yê KCD'ê Osman Ozçelik ji bo pêşberendamiya Şaredariya Mêrdînê çû navenda Rêxistina Mêrdinê û serîlêdana xwe kir.

Xebatên ji bo hilbijartina herêmî ya BDP'ê bi hemû gurahiya xwe didomin. Li her bajar û navçeyan serîlêdan didomin. Li Mêrdinê jî. Li Mêrdînê heta niha Newroz Turk, Mehmet Tanhan (Şaredarê Nisêbînê yê berê) û du kesên din ji bo pêşberendamtî serî lêdabû. Niha Ozçelîk jî ji bo pêşberendamtî serî lêdan û rewş xurtir bû. 

Ozçelik ku ji HEP'ê ve heta BDP'ê di nav rêxistinên siyasî de kar kiriye, Cîriya Serokê Giştî jî di nav de di gelek qadên partiyê de cih girtiye. Herî dawî mebûsê BDP'ê yê Sêrtê bû. Niha jî ew di nav KCD'ê de xebata xwe didomîne.

Osman Ozçelik bi pênûsa xwe de xwedî cihek taybet e û heta niha yek jê lêkolîn, 4 jê werger 5 pirtûkên  wî derketine.

Ji bilî çend cihan, li hemû navçe û bajaran BDP'ê dê pêşhilbijartinê bike. Ji bo vê yekê li bajaran delegeyan saz dike. Li Mêrdinê jî niha xebatên ji bo pêşhilbijartinê delege têne amadekirin. Li gor agahiyên ber destê me li Mêrdînê dê 4 hezar delege dengên xwe bidin pêşberendaman û kî bi ser bikeve ew dê wekî Berendamê Şaridariya Bajarê Mezin a Mêrdînê bê nîşandayîn. Ozçelik jî yek ji van pêşberendam e. Piştî serîlêdanê Ozçelîk ji bo malpera me axivî, da zanîn ku dê pêşhilbijartineke demokratîk pêk bê û di vî warî de ew bi xwe bawer e dê bi ser bikeve. Her wiha Ozçelik got ku emê Şaredariya Mêrdînê bi dest bixin.

Li Mêrdinê li bendê ne ku di hefteya yekemîn a meha pêşiya me de pêşhilbijartin ji bo pêşberendaman bê kirin. 

***

Nûçeyên eleqedar:

- BDP vê carê dê çend şaredariyan bi dest bixe?

- Şaredarê CHP’yî yê berê beşdarî BDP’ê bû