Diyarname
Kovara dumehane Tîroj di vê hejmare de dosyaya xwe li ser "68'ê kurdan, kurdên 68'an" amade kiriye.

Tîroj bi hejmara xwe ya 33'yan a tîrmeh-gelawêjê de bi nivîs, helbest, çîrok û hevpeyvînên xwe derket pêşberî xwendevanên xwe.

Di vê hejmara kovarê de rojnameger Ragip Duran bi sernavê "Şêx Seîd jî nedikarî bi televîzyonê meseleyê hel bike!" nivîseke nivîsiye û meseleya TRT'ya bi kurdî rexne kiriye.
Îrfan amîda bi nivîsa xwe "Çiroka avakirina dewleta tirk û asîmîlasyon" girtiye dest, rewşa çîroka asîmîlasyonê nirxandiye. Sînan Gundogar jî di nivîsa xwe de nîqaşeke li ser muzîka kurdî daye dest pê kirin.

Nivîskar Cemşîd Benderê ku demek berê wefat kiribû nivîseke wî ya bi navê "Di Zerduştî û Elewîtî de Adem û Hawa" hatiye weşandin.

Di beşa hevpeyvînan de jî Cemil Oguz bi Taylan Şahan Tarhan re li ser çîroka wî û meseleya aştiyê pêre hevpeyvîneke kiriye. Tarhan bi çîroka xwe di Pêşbaziya Qala Aştiyê Bike de bûbû yekemîn û ev çîroka wî jî di vê hejmara kovarê de cih girtiye. Zekî Ozmen bi Xelîl Xemgin re li ser albuma wî ya nû "Ax"ê, Receb Dildar bi siyasetmedar û nivîskar Veysel Çamlibel re û Kak Zêwer jî bi wênesaz Ehmet Roînar re li ser wêneyên wî axivî.

Di kvarê de Zeynep Gambetti, Nevzat Onara, Bahar Şahin, Dr. Omer Uluçay, Azad Arjîn, Bedirxan Epozdemir, M. Ali Işik, Akman Gedik, Ahmet Yaşaroglu, Fehim Işik, Ali Çinar, Berat Gunçikan, Mehmet Bakir bi nivîsên xwe cih girtine.

Yek ji aliyên balkêş a vê hejmarê jî dosyaya ku hatiye amadekirin e. Dosya li ser kurdên 68'an e. Îsal 40'emîn salvegera pêla 68'an e. Di vê 40 salî de heta niha gelek panel hatin li dar xistin, giftûgo hatin kirin. Tîrojê jî li ser vê 40 salî sekiniye lê ji aliyê kurdan ve, rewşa şoreşgerên kurd ên wê demê nîşan daye.
Dosyaya ku bi ser navê "68'ê kurdan, kurdên 68'an" hatiye amadekirin de şoreşger Faik Bulut, Hikmet Bozçali, Ertugrul Kurtçu û Aydin Çubukçu li ser wê demê axivîne, bîranînên xwe anîne ziman, rewşa wê demê, rewşa têkoşerên kurd ên wê deme pêşkêş kirine.
Ji bo bîranîna wê demê, ji bo noteke nivîsandina li dîrokê dosyayeke balkêş e.

***

Bi şertê nîşandayîna çavkaniyê her kes dikare nûçe û nivîsên Diyarnameyê bikar bîne. Bêyî nîşandayîna çavkaniyê bikaranîna nûçe û nivîsên Diyarnameyê qedexe ye.