Şirnex
4'emîn Festîvala Berxbirê ku li Zozana Laleşê ya Navçeya Elkê hate lidarxistin, bi sedema pêkutiya leşkeran rojek berê hate bidawîkirin. Mihrîcana Berxbirê bi pêşbirkên penêr, mast û nîvişk bi dawî bû. Kesên beşdarî festîvalê bûn li ber def û zurneyan govend girtin.

4'emîn Festîvala Zozan û Çand-Huner a Berxbirê ku ji aliyê Şaredariya Elkê ve hate lidarxistin, bi sedema pêkutiyên leşkeran, piştî aloziya bi saetan dom kir, bernameya festîvalê bi dawî bû. Di festîvalê de pêşbirkên, şivanî, dermale, mast, penêr û nîvişk hatin lidarxistin.
Di juriya berxbirê de Şaredarê Surê yê ji peywirê hatiye girtin Abdulla Demîrbaş, Endamê PM'ya DTP'ê Kemal Aktaş, Şaredarê Hezexê Resul Sadak, Şaredarê Kayapinara Amedê Zulkuf Karatekîn û Şaredarê Şirnexê Ahmet Ertak cih girtin. Şivanên ku bi tezahuratên beşdarvanan tevlî pêşbirkê bûn, ji bo qezenc bikin kedek mezin dan. Piştî berxbirê, pêşbirka penêr, mast û nîvişk hate lidar xistin. Şaredarê Cizîrê yê ji peywirê hatiye dûrxistin Aydin Budak ku di juriyê de cih digirt, li tema penêr, mast û nîvişkên ji aliyê jinana ve hatibûn amadekirin nêrî û kesên herî baş diyar kirin.

Piştî vekirina pêşengeha palas û tiştên destan a ji aliyê Şaredariya Elkê ve hatibû amadekirin, ji bo yên ketin dereceyê xelat hatin dayîn. Di pêşbirka dermaleyan de Melul Ataman, di ya berxbirê de Fehmî Yîgît bûn yekem. Di pêşbirka berxbirê de Rahmî Yîgît duyemîn û Fîndî Cîn jî bû sêyemîn. Di pêşbirka şivantiyê de jî dîsa Fehmî Yîgît kete dereceyê. Di pêşbirka mast de Gozel Ataman yekemîn, Xeme Cîn jî bû duyemîn. Di pêşbirka penêr de jî Berîvan Dursun yekemîn, Husna Cîn jî bû duyemîn. Di pêşbirka nîvişk de Kerîme Ulaş yekemîn, Husna Cîn jî bû duyemîn. Parlamenterên DTP'ê xelatên kesên ketin dereceyê dan. Piştî merasîma xelatan govend hate girtin.

Piştî pêşbirkê parlamenterên DTP'ê yên Şirnexê Sevahîr Bayindir, Hasîp Kaplan, Şaredarê Kayapinarê Zulkuf Karatekîn, endamên PM'ya DTP'ê Selanîk Oner, Kemal Aktaş, Îzzet Belge, Şaredarê Surê yê ji peywir hatiye girtin Abdullah Demîrbaş, Şaredarê Cizîrê yê ji peywîr hatiye dûrxistin Aydin Budak, Şaredarê Şirnexê Ahmet Ertak, Parlamenterê berê yê DEP'ê Selîm Sadak, Şaredarê Hezexê Resul Sadak, Serokê Rêxistina DTP'ê ya Şirnexê Halîl Îrmez, Şaredarê Elkê Faîk Dursun û Serokê Rêxistina DTP'ê ya Elkê Yusuf Temel ku beşdarî mihrîcanê bûn, li ber def û zurnê govend girtin.

Piştî serdagirtina mihrîcanê ya duh hate jiyandin, leşkerên ku vê sibehê bi cekan hatin qada mihrîcanê, xwestin kesên ne ji Elkê ne ji qada mihrîcanê veqetin. Piştî xatir xwestinê ji bilî welatiyên ji Elkê û gundên derdora wê hatibûn tu kes li qadê nema.

Ji DÎHA'yê hatiye girtin