Serey 2008 bî. Yanê 8 serî verî. Vengê zingilê telefonê mi hame. Karê min bîbî, ez nêşkawa bawnî tera. Dimay kar temam bî, ez hawnawa embazê min Yeqîn H. geyrawo. Ez roci geyrawa. Vat: "Şima qeybî televîzyonî fîlman dublaj kenê. Destê şima de xêzefîlmê dublajkerdey ê kurdî çiniyê bişrawe ke Biyan Êvar ro ci temaşe bikero?"
Bersivê min "nê" bî, çimkî destê ma de xêzefîlmê bi kurdî çinêbî. Helbet ez xemgîn biya, çimkî ma qeybî tûtanê (gedeyanê) xo zêde çî nêviraştî bî.
Zeman ser ra derbas bî, Biyan Êvar bî pîl, ew hendî mihtacê xêzefîlman nêbî la Biyan Êvarê bînî bîbî, qickekê bînî...
Dimara ez jî biya bab, tûtê min jî viraziyay. Rocêke min tûte rê pêlîstokêke "Şînok" girot û berd keye. Tûte qet tera hez nêkerd. Helbet ez şaş biya. Gava ma tûtî bî ma "Şînok"an ra hez kerdêne la joy marê nêgirotêne.
Serê na joy ra zehf dem derbas nêbî, henî merdimî hamey tê het û kanalêke televîzyonî ke tenî qeybî tûtan weşan keno viraşt. Kanal bi kurdî (kurmancî/kirmacnkî) bî. Namey cê nabî ro, "Zarok TV". Di Zarok TV de yew xêzefîlm jî "Şînok" bî. Dima ke tûtey min roj Zarok TV temaşe kerd û "Şînok" dî, geyra a ro pêlîstokey Şînok û tedir kay kerd; tera hez kerd.
Zarok TV tenî xêzefîlmî nîşan dayne. Tenî qeybî tûtanê ma bî.
Zarok TV zehf serkewte bî?
Nê.
Zarok TV bi xo xêzefîlmî viraştêne?
Nê.
La destpakerdiş bî, bar girot bî we û ga hema zehf raver şoro. Ga ziwanê yînan ê dublajî jî baştir bibo, ga miyanê demî de beşkê ê bi xo xêzefîlman jî virazê. La nêbî. Nêbî, çimkî henî xêrnexwazan kanal girot.
Go reyna kanal abo, yan nê ez nêzana. La ez zana ke hezf pêdivî tûtan bi qanal bîbî û enka ê tûtî bê kanalê xo mendê.
Dinya de pênaseyke "mafê merdiman" esto. Mafê merdiman heme ca de derbas beno; mekteb de jî, temaşekerdinê kanalê bi ziwanê xo de jî, kaykerdişê parkanê tûtan de jî... Bi girotişê Zarok TV ra mafêkey merdiman ê tûtanê ma destê înan ra heme girotişî.
De ez hendî çi vacî?
.jpg)
.jpg)
.jpg)
