Edîb Polat

TRT 6 ji dema ku dest bi weşanê kiriye, ne tenê xeletiyên ziman kiriye, her wiha berheman bêyî destûra xwedî, bestekar an nivîskarê wan diweşîne. Wekî tê zanîn çendekî berê bêyî destûra hunermend Rojda, hin stranên wê dabûn çapkirin û ev yek bibû sedemê berteknîşandina wê hunermend kurd.

TRT 6 heman bêexlaqiyê ji bo pirtûka min a RISTEMÊ ZAL pêk aniye. Roja 09. 02. 2011, saet di 22’ê şevê de programek çîrokbêjiyê bi navê “LI BIN SIYA DESTANAN” hat pêşkêşkirin.

Pêşkêşvanê vê çîrokbêjiyê kesekî berê di Şanoya Bajarê Mezin de dilîst bû. Wî egal dabû serê xwe, di dilqê kalemêrekî de çîroka Ristemê Zal digot. Lê bala min kişand ku ew bûyerên wê çîrokê ji romana min a bi navê Ristemê Zal hatibûn girtin. Min pirtûkê girt destê xwe û ew şopand, tiştên ku çîrokbêj digot, kurtahiya romana min bû.

Di wê programê de beşa zewaca Ristem û Tehmîne dihat gotin û di berdewamiya wê de qala paşayê Semenganê ku keça xwe ya bi navê Tehmîne çawa li Ristemê Zal mar dike tê kirin. Hespê Ristem Rexşê Belek winda dibe, ew li pey diçe bajarekî, qralê bajêr Ristem diezimîne, Ristem ew şev li mala wî dibe mêvan. Bi şev keça wî diçe cem Ristem. Ji bihevrebûna wan demek bi şûn de kurek ji Tehmîne re çê dibe, navê wî Suhrab datînin. Ristem beriya ji wî bajarî vegere Kela Zabilê, ew keçik mar dike, lê diyariyek dide wê. Gava Suhrab mezin dibe diya wî ew diyarî wekî hemayil dike sitûyê kurê xwe. Suhrab bêyî ku bavê xwe nas bike dibe pêhlewanek jêhatî. Neyarê Mala Zalê Elfesiya dixwaze Suhrab û bavê wî bera hev bide û kîn û buxda li hember Key Kawus dike dilê wî. Rojekê Suhrab dibêje ez dê biçim şerê Key Kawus, ez dê wî têk bibim, bavê xwe li Zabilistanê bibînim û wî bikim Şahê Îranê. Gava dikeve rê rast li qelayek tê, bersiyarê qelê yekî bi navê Hêjîr bûye. Ew û Hêjîr diçin cihê konê Îraniyan, digel ku Ristem jî li wê qadê bûye, Hêjîr konê wî rê Suhrab nade.

Di encamê de bav û kur bêyî hev binasin li qada şer dertên hemberî hev. Suhrab dixwaze pêhlewanê xurt yê li hember xwe nas bike, lê Ristem ji ber xurûra xwe ya mezin, li eyna xwe danayne ku bi xortekî wusa re navê wî derê, înkar dike ku ew Ristem e. Ewil Ristem dikeve erdê, lê Suhrab wî nakuje, dibêje urf adetên me Îraniyan hene, bi ketina ewil re mirov pêhlewanan nakuje.

Di dawiya şer de Ristem keys li Suhrab tîne û birînek di ser dilê wî de vedike. Suhrabê birîndar dibê “Xalo, va ye ez dimrim, tu xebera kuştina min bide bavê min Ristemê Zal!” Ew gav Ristem digrî û xweliyê bi serê xwe de dike, dibê “lawo, te heta niha çima nedigot ez kurê Ristem im?”

Beşek ji romanê ev tirajedî ye û di TRT 6 de bi vî rengî, wekî ku di romana min de cih digre, bêyî destûra min û bêyî ku çavkanî bidin nîşandan, ew weşandine. Ev tevgerek bêhiqûqî û bêexlaqî ye. Ger dubare bibe, ez dê mafê xwe yê hiqûqî bi kar bînim. Ez vê tevgera TRT 6’ê şermezar dikim.

edibpolat@hotmail.com

***

Nivîsên bi mijarê re eleqedar: 

- Samî Tan: Şerma giran

- Helîm Yûsiv: Hewildanên normalkirina cerdevaniya sipî (1/2)

- Fêrgîn Melîk Aykoç: Hunermendek û derdorên ne bes e, lê dîsa jî erê

- Daxuyaniya Şivan Perwer

- Nîjad Yaruk: Şivan Perwer çi dixwaze?

- Mazbar Gunbat: Lo te çi kir, te çi kir!?.

- Medenî Ferhon: Bed-ayînî Şivan Perwer î dewşirme

- Îkram Balekanî: Reklama Şivan Perwer