Diyarname
Şaredariya Kayapinara Amedê bi kurdî Rojên Belgefîlman li dar dixe. Kesên bixwazin belgefîlmên xwe bişînin divê heta 21'ê adara 2011'an berhemên xwe bigihînin ber destê amadekaran.

Ji bo radihandina li darxistina 1'emîn Rojên Belgefîlman a Amedê li Navenda Çanda Ciwanan a Cegerxwîn bi beşdariya Cîgirê Şaredarê Kayapinarê Îhsan Avci, Berpirsê Sînemayê Ozkan Kuçuk û Midûrê Karên Çandî û Civakî ya Navendê Aydin Bolkan daxuyaniyeke çapemeniyê hate li dar xistin.

Pêşî Îhsan Avci axivî û da zanîn ku li bajarên cur bi cur festîval li dar dikevin, belgefîlmên ku bi awayekî hatine sansurkirin û negihane gel ewê bigihînin gel

Rojên Belgefîlman ku îsal yekemîn car e li dar dikeve dê pirzimanî be lê di serî de bi kurdî. Belgefîlmên bi kurdî bin dê bêne nîşandayîn, yên ne bi kurdî bin jî dê bi jêrnivîsa bi kurdî bêne nîşandayîn. Belgefîlm di warê pêşbazî û di warê nîşandayînê, di du waran de bêne nîşandayîn.

Rojên Belgefîlman ku di navbera 18-24'ê avrêla 2011'an de wê bê li dar xistin armanc ew e ku sînemaya belgefîlman bigihêje civakê û geşkirina çêkirina belgefîlman teşwîq bike.

Rojên Belgefîlman piştgirî dide xebatên ku derhênerên jin çêkirine, her wiha Rojê Belgefîlman ji bo ku karibe piştgiriya gihandina sînemagerên ciwan bike di salên pêşiya me de dê ji bo fîlmên ku di asta projeyê de ne foneke ava bike.

Amadekarên Rojên Belgefîlman ên Amedê diyar kirin ku ev xebata wan di heman demê de dê ji bo danasîna bajar û heremê jî roleke gelek girîng û mezin bilîze.

Amadekaran wisa dawî li axaftina xwe anî: "Em bawer dikin ku ew ê Rojên Belgefîlman ên Amedê ji vê salê ve dest pê bike û di salên pêşiya me de wek dibistaneke belgefîlman fonksiyona xwe bilîze."

Ji bo kesên eleqedar şertên serîlêdanê û tiştên têne xwestin:

ŞERTÊN SERÎLÊDANÊ
1- Ji bo pêşbaziyê belgefîlmên di 2010-2011’an de hatine çêkirin bêyî ku ji bo mawe û mijarê sînor hebe dikarin serî lê bidin.
2- Ji bo beşa danîşanê, belgefîlmên 2009’an jî dikarin serî lê bidin.
3- Ji bo belgefîlmên ku di demên berê de beşdarî mihrîcanan bûne an jî di van mihrîcanan de xelat wergirtine di serîlêdanê de tu astengî tune ye.
4- Heman derhêner ji belgefîlmekî zêdetir nikare serî lê bide.
5- Divê materyalên serîlêdanê herî dereng di 21 Adar 2011’an de bi dest an jî bi posta-kargoyê bighêje Navenda Çand û Hunerê ya Cegerxwîn.
6- Ji bo hilbijartina belgefîlmên pêşbaziyê ew ê bijartineke pêş were kirin. Lijneya Hilbijartinê ya Pêş, belgefîlmên ku ji bo pêşbaziyê hilnebijartiye dikare ji bo danîşanê pêşniyar bike. Xwediyê fermî yê belgefîlmê ger nexwaze li derveyî pêşbaziyê belgefîlmê wî/wê were nîşandan divê herî dereng 5 Avrêl 2011’an bi nivîskî ji rêveberiya mihrîcanê re ragihîne.
7- Belgefîlmên ku ji bo pêşbaziyê hatine hilbijartin ger zimanê axaftinê ne kurdî (kurmancî) bin herî dereng divê di 15 Avrêl 2011’an de kopiyên wan ên danîşanê ên bi jêrenivîsa kurdî an jî lîsteyên wan ên axaftinê bighînin navenda mihrîcanê.
8- Hemû belgefîlmên ku xwediyê helwesteke demokratîk û ji mafê zarok û jinan re hurmetkar e, dîsa êrîşî nirxên têkoşînên civakî nekiribin dê ji bo danîşanê têkevin nava bernameyê.
9- Kopiyên DVD ên belgefîlmên ku ji bo serîlêdane hatine şandin dê ji xwediyê wan re bi şûn ve neyê şandin û dê di Beşa Sînemayê ya Akademiya Cegerxwîn de bibe arşîv û di perwerdehiya sînemayê de ji bo lêkolînê dê were bikaranîn.
10-  Xebatkarên Şaredariya Kayapinarê û yên Navenda Çand û Hunerê ya Cegerxwîn nikarin ji bo beşa pêşbaziyê serîlêdan bikin. Lê ji bo beşa danîşanê dikarin serî lê bidin.
11-  Peywira biryarê ya ku di mijarên ku di vê rêziknameyê de nehatiye nivîsandin de ayidî Lijneya Rêvebirina Rojên Belgefîlman ên Amedê ye.
12-  Lijneya Hilbijartina Pêş û Lijneya Pêşbaziyê dê piştre were ragihandin. Forma serîlêdanê dikare ji malper û navnîşanên hatine diyarkirin were bidestxistin…

MATERYALÊN KU JI BO SERÎLÊDANÊ TÊNE XWESTIN
Bi forma serîlêdanê ya destnîşankirî re;
1-3 heb kopiyên DVD ên belgefîlm (ger guncan be bi jêrenivîsa kurdî be)
2-Sînopsîsa belgefîlm (Tirkî, Kurdî û Îngilîzî)
3-Lîsteya axaftinê ya orjînal a belgefîlm
4-Kurtejiyana derhêner (Tirkî, Kurdî, Îngilîzî)
5-Afîşa belgefîlm (Li ser kompîterê)
6-3 heb wêneyên ji belgefîlmê (Li ser kompîterê)
7-1 heb wêneyê derhêner (Li ser kompîterê)

SEKRETERYA
Hemû xebatên Rojên Belgefîlman ên Amadê dê ji hêla Lijneya Rêvebirina Rojên Belgefîlman ên Amedê ve were meşandin.  
Li ser navê Lijneya Rêvebirinê peywira sekreteryayê dê ji hêla Ozkan Kuçuk ve were meşandin.

Pêwendî
Navnîşan: Kayapınar Belediyesi Cegerxwin Gençlik  Kültür ve Sanat Merkezi Diclekent Bulvarı Park Ormanı yanı- KAYAPINAR-DİYARBAKIR
Telefon: 0412 251 92 95- 251 92 96
e-mail: diyarbakirbg@hotmail.com
www.diyarbakirkayapinar.bel.tr
www.cegerxwin.net

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.