Diyarname
Ji bo keça wî sirûda "Andimiz" nexwîne Hevserokê BDP'ê Selahattin Demirtaş serî li Perwerdehiya Neteweyî ya Amedê da.

Li Tirkiyeyê di dibistanan de bi kurdî perwerdehî nîn e. Zarokên kurd her roj di dibistanan de bi tirkî perwerdehî dibînin, bi ser de jî sirûdên cur bi cur dixwînin. Yek ji wan sirûdan ku her serê sibê digel hemû zarokên Tirkiyeyê bi mîlyonan zarokên kurd jî dixwînin bi navê "Andimiz" e.

Ji bo "Andimiz" (Sonda Me) êdî neyê xwendin Hevserokê BDP'ê Selahattin Demirtaş gavek avêt.
Keça Demirtaş a bi navê Delal Demirtaş li Dibistana Seretayî ya Hattat Hamit Aytaç, di pola 1/F ya Amedê de dixwîne. Demirtaş bi daxwaznameyeke serî li Midûriyeta Perwerdehiya Neteweyî ya Amedê da û xwest bi keça wî wê sirûdê nedin xwendin.
Demirtaş di daxwaznameya xwe de wisa got:
"

 “Jibo keça min ya bi navê Delal ku li refa 1/F ya Dibistana Seretayî ya Hattat Hamît Aytaç dixwîne mafê perwerdeya zimanê zikmakî nayê dayîn, her wiha her roj dibin navê sonda me de sonda ku gotinên nîjadperest di nava xwe de digire pê didin xwedin, ez xwendina vê sondê napejirînin. Ez pêkanînekî wiha ya li hember zarokan tê pêkanîn wekî binpêkirina mafê mirovan dibînim.
Ez diyar dikim ku ji niha û pêve ezê keça xwe Delal Demîrtaş bi awayek fiîlî ji vê çalakiyê dûr bigirim, her wiha ez daxwaz dikim ku çalakiya sonda me bi awayek fermî bê rakirin û keça min bi awayek fermî ji vê kiryarê azad bê hiştin."

"Andimiz" a ku her roj bi mîlyonan zarokên dibistanan dixwînin wisa dest pê dike: “Ez Tirk im, rast im, jêhatî me...”  û bi van gotina bi dawî dibe: "Hebûna min bila diyarî hebûna tirk be. Çi dilşadî ye mirov bibêje ez tirk im."
Di serî de zarokên kurd bi mîlyonan zarokên li Tirkiyeyê ku ne tirk in jî vê sondê ji mecbûrî dixwînin.

Wekî notek: Demirtaş par di serdema destpêkirina dibistanan de jî keça xwe biribû qursa kurdî û ew qeyd kiribû.

**

Nûçeya eleqedar:

- Hevserokê BDP'ê Demirtaş keça xwe şand qursa kurdî