Diyarname
Soberînerê amerîkî Michael Phelps li Olîmpiyatê payeya sporkarê herî serketî bi dest xist.

Soberînerê amerîkî Michael Phelps di 8 pêşbaziyên di Olîmpiyata Pekînê de 8 madelyayên zêrîn bi dest xist û rekora dinyayê şikand. Phelps di soberiya duh de 4x100 de bi ferqa sedî 1 bi ser ket û madelyaya zêrîn girt.
Phelps di Olîmpîyata 2004'an a Atînayê de di pêşbaziyan de 6 xelat girtibû û di van du Olîmpiyatan de bû 14 xelatan bi dest dixe û bi vî awayî jî rekora dinyayê şikand.

Phelps berî beşdarî Olîmpîyata Pekînê bibe ji bo rekora soberînerê amerîkî Mark Spitz ku di Olîmpiyatekê de 7 xelat girtibû bişikîne 8 xelat ji xwe re kiribû hedef û ew gihîşt hedefa xwe. Mark Spitz di Olîmpiyata Munihê ya sala 1972'yan de ev rekor bi dest xistibû.

Her wiha kesek ku di olîmpiyatan de sê caran ser hev de beşdar bûye û gelek xelat bi dest xistine jî cîmnastîkvanê Nikolay Andrianov ê Sovyeta Berê ye. Andrianov di olîmpiyatên  1972, 1976 û 1980 bi giştî 7 madalyayên zêrîn, 5 madelyayên zîvîn û 3 jî madelyayên bronz bi giştî 15 madalye bi dest xistibû. Michael Phelps ê amerîkî di van du olîmpiyatan de 14 xelat bi dest xist û ji bo rekora Andrianov jî bişikîne divê beşdarî olîmpiyata 2012'yan a Londonê jî bibe.
Heta niha di olîmpiyatan de sporkareke jin a Sovyeta Berê Larissa Latinina bi giştî 18 madelya bi dest xistiye û niha rekora dinyayê di destê wê de ye. Larissa Latinina di sala 1956, 1960 û 1964’an de sê caran beşdarî olîmpiyatê bû û 9 madelyayên zêrîn, 5 zîvîn û 4 bronz bi giştî 18 madelya bi dest xistû.
Ger soberînerê amerîkî Phelps beşdarî Olîmpîyata Londonê ya 2012'yan bibe û li vê derê 3 madelyayan bi dest bixe dê vê rekorê jî bikişîne.

Phelpsê yekem car di sala 2000'î de beşdarî Olîmpiyata Sydney bû, lê di pêşbaziyê de bû 5'emîn û xelat negirt. Phelps bi vî awayî kêfxweşiya xwe anî ziman: "Tiştê herî xweş e ew ku hat çespandin ku nemimkûnî nîn e."

Michael Phelps di 30'yê pûşpera 1985'an de li Baltimoreya DYA'yê hatiye dinê û ji 6 saliya xwe ve bi soberî re eleqedar e.