Oktay Candemîr / WAN

Şaredariya Wanê ya AKP`ê navên Yaşar Kemal û Ehmedê Xanî ji parkan rakir, navê Wezîrê Perwerdehiya Neteweyî Huseyîn Çelîk ê AKP'yî da parka nû ku hatiye çêkirin. Şaredariyê navê Çelîkê ku `doçent` e wekî `Prof. Dr. Huseyîn Çelîk` nivîsî.

Şaredarê Wanê yê AKP`î Burhan Yenîgun ku tabelayên parkên ku navên Yaşar Kemal û Ehmedê Xanî lê hatibûn kirin ji holê rakir û navê Wezîrê Perwerdehiya Neteweyî Huseyîn Çelîk lê AKP'yî da parka nû ku hatiye çêkirin.
Çelîk, di meha borî de li Wanê neserkeftina şaredariyê kiribû stûyê Yenîgun û gotibû ku di hilbijartinan de, ew Yenîgun nakin namzetê şaredariyê. Hate gotin ku Yenîgun dixwaze xwe li ber çavê Çelîk şîrîn nîşan bide, lewre jî, navê wî li parkê kiriye û bi vî rengî dîsa bibe namzet.

‘XWE BAŞ NÎŞAN DIDE’

Endamê Meclisa Şaredariyê yê DTP`î Sabrî Abî, anî ziman ku Yenîgun dixwaze xwe li ber çavê Çelîk baş nîşan bide. Abî, got ku tu xêra Çelîk ji Wanê re tune ye û navdayîna wî ya parkê jî, li hemberî gelê Wanê îxanet e. Abî, da zanîn ku di civîna meclisê de wan li hemberî biryarê îtiraz kiriye, lê bi dengên encumenên AKP`yî navê Çelîk li parkê kirine.

PÊNASEYA PROF...

Abî, diyar kir ku pênasa Çelîk doçent e, lê Yenîgun, ji bo ku xwe şirîn nîşan bide, ev pênase kiriye profesor û ev jî li dijî hiqûqê ye. Abî, wiha axivî: "Em ê vê mijarê bibin dadgehê. Yenîgun berî niha navê Yaşar Kemal û Ehmedê Xanî ji parkan rakiribû. Yenîgun, her carê dijminiya xwe ya li hemberî van kesên girîng tîne ziman, niha jî rabûye û navê Çelîk daye parkan."

Ji DÎHA'yê hatiye girtin