Cemil Oguz

Pêşbaziya "Kî Zane" ku Murat Batgi amade û pêşkêş dike dest pê dike.

Heta niha li Tirkiyeyê kanaleke televîzyonê pêşbaziya zanînê ya bi kurdî li dar nexistiye. Vê yekê kanaleke herêmê Gun TV dide dest pê kirin. Gun TV ku li Amedê û derdora wê weşana xwe didomîne di heman demê de di çarçoveya ku RTUK destûrê dide de weşana bi kurdî jî dike. Televîzyon niha şanenava xwe davêje bin bernameyeke nû. Bernameya ji aliyê Murat Batgi ve hatiye amadekirin û tê pêşkêşkirin. Bernameya bi navê "Kî Zane" diruşma wê jî "Kî zane karê wî pir hêsan e, kî nizane barê wî pir giran e" ye.

Batgi li ser bernameyê agahî da me û da zanîn ku bernemeya ku 15 hefteyan dê bidome hemû hatiye kişandin. Ji bo beşdarbûna pêşbaziyê nêzî sed kesî serî lêdane lê 16 kes hatine hilbijantin. Di her bernemayê de du kes dê bên hemberî hev û yên ku bi ser bi kevin dê wekî 8 kes derkevin çarîk fînalê. Dûre ev 8 kes ji bo nîv fînal û fînalê dê bi hev re bikevin pêşbaziyê. Di dawiyê de dê şampiyonekî/e derkeve holê. Heta niha hemû bername hatin kişandin, şampiyon diyar bû lê heta dawiya bernameyê eşkere nakin.

Di 8 waran de pirs têne pirsîn

Yekem bernameya "Kî Zane"  dê 24'ê mehê bê weşandin û bernameya dawî jî şeva sersalê. Pirsê bernameyê di warê  aktuel û siyaset, spor, tenduristî, dîrok, çand û huner, erdnîgarî, ziman û wêjeya kurdî bi giştî ji 8 waran, ji her warê sê pirs têne pirsîn.
Ji bo 8 kesên ku pêşîn ji pêşbaziyê veqetin CD'yeke kurdî, ji bo yên ketine çarîk fînalê jî ji marketeke li Amedê çekek 150 YTL'yî tê dayîn. Yên ku ketin nav çarên dawî makîneyeke fotografan a dijital, ji bo kesê derketiye fînalê kamerayeke û ji bo şampiyon jî çekek, makîneya fotografan, kamera û kompîtureke ser çongan wekî xelat tê dayîn.

Li ser bernameya ku li bendê ne eleqeyeke baş bibîne me bi Batgî re xeber da. "Kî Zane" li Tirkiyeyê yekemîn bernameya pêşbaziya pirs û bersivan e. Batgî dibêje, "Cîhan û jiyan bi kurdî xweş e" û wiha didomîne: "Heta kurdî di hemû warê jiyanê de nebe hakim, di hemû îlmên zanînê de neyê bikaranîn, tenê bi siyaset û wêjeyê pêşnakeve."

Her tişte ji bo gel ji ziman hez bike

Batgî dibêje ku semboleke biçûk a kurdî jî divê em li hemû warên jiyanê bikin hakim û wiha dibêje, "Her çiqas pêdivî bi kampanyayan hebe jî berî her tiştî gere em vî zimanî bi mirovan bidin hezkirin. Divê mirov ji vî zimanî hez bikin. Ger gel ji vî zimanî hez neke ne mimkûn e ev ziman pêş bikeve. Emê vî zimanî çawa bi gel bidin hezkirin? Tenê yên ku di saziyan de dixebitin nikarin vî zimanî pêş bixin, divê gel xwedî li vî zimanî derkeve. Ji bo vê yekê divê jê hez bike. Em dikin ku bidin hezkirin. Pêşbazî jî amûreke vê yekê ye."

Li gor gotina Murat Batgi kesên wekî pêşbaz beşdarî pêşbaziyê bûne yek jî di saziyan de nexebetîne, ew ji nav gel, mamoste, dixtor, karmend, karker û xanima malê bûn û van gotinan lê zêde dike: "Ez bawerim kesên beşdarî pêşbaziyê bûn êdî dêher warê jiyanê bi kurdî bişopînin."

Hin malperên kurdan nivîsî bû ku dê bernameyê bifroşin TRT Kurdî. Batgî vê yekê red dike û wisa dibêje: "Ji tişteke wisa qet xebera min nîn e. Bêşik mirov dikare bi TRT'yê re jî bi xebite lê bi şert û şurtan. Berî her tiştî peymana min bi Gun TV re heye. Her wiha ez ne ew kurd im ku TRT lê digere."

Batgi di dawiyê de ji bo piştgiriya wan sipasiyên xwe pêşkêşî Şaredariya Bajarê Mezin a Amedê, Şaredariya Yenîşehîr, Baglar û Kayapinarê dike.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.