Amed
Nivîskar û rojnamegerê kurd Apê Musa li cihê lê hat qetilkirin ji aliyê bi sedan kesî ve hate birbîranîn.

Platforma Demokrasiyê ya Amedê û rojnameya Azadya Welat bi boneya 16'emîn salvegera şehadeta rojnameger û nivîskarê kurd Musa Anter, li cihê lê hat qetilkirin, daxuyaniyek da çapemeniyê. Parlementerên DTP'ê Gultan Kişanak, Hamît Geylanî, Serokê DTP'a Amedê Nejdet Atalay, Şaredarê Bajarê Mezin ê Amedê Osman Baydemîr, Şaredara Baglarê Yurdusev Ozsokmenler, Nûnerê ÎHD'ê yê Herêmê Mîhdî Perînçek, Berdekvê Platforma Demokrasiyê ya Amedê Alî Oncu, Endamê Lijneya Weşanê ya Rojnameya Alternatîfê Nûrî Firat, xebatkarên Azadiya Welat, xebatkarên DÎHA'yê û bi sedan kes beşdarî bîranînê bûn.

Di bîranînê de wêneyên Musa Anter û şehîdên çapemeniya azad hatin hildan. Piştî rêzgirtina Berdevkê Platforma Demokrasiyê ya Amedê Alî Oncu axaftinek kir û got: "Anter ji aliyê dewlet û çeteya Ergenekonê ve hat qetilkirin. Qetilkirina Anter şerma Tirkiyeyê ye. Ligel yên Apê Musa qetil kirîn demokrasî û mirovahî tune ye. Demokrasî û mirovahî tenê ji bo wan heye."

Piştî Oncu, endamê Lijneya Weşanê ya rojnameya Alternatîfê Nûrî Firat jî diyar kir ku kujerên Anter kişf in û ev di rapora Susurlukê de hatine eşkere kirin.

Piştî axaftinan gel diruşma "Şehîd namirin" avêtin. Li cihê Anter lê hat qetilkirin, qurnefîl hatîn danîn.