Diyarname

Di hilbijartina li Yewnanistanê de li gor agahiyên ne fermî Syrîza bi sedî 36,23 li pêş e û di rêza duyemîn de Demokrasiya Nû heye sedî 27.94 deng girtine. Partiya nijadperestan Berbanga Zêrîn jî sedî 6.32 (17 mebûs) girtine.

Li Yewnanistanê îro hilbijartina giştî li dar ket. Li parlemena Yewnanistanê 300 mebûs hene. Ji bo partiyek bi tena serê xwe bibe desthilatdar divê 151 mebûsî bi dest bixe. Heta ber êvarkî sedî 83.39 deng hatibûn jimartin. Li gor vê reqemê Syrîza bi sedî 36.23 li pêş e ku ev reqem encax 149 mebûsî dide wê. Syrîza koalîsyonek e ku navê "Koalîsyona Radîkal" e lêkirine.

Li gor Wezareta Karên Hundir a Yewnanistanê heta niha ev deng derketine holê:

- Syriza % 36,23 (149 Mebûs)

- Demokrasiya Nû % 27,94 (77 Mebûs)

- Berbanga Zêrîn % 6.32 (17 Mebûs)

- Po Tami % 5.99 (16 Mebûs)

- Partiya Komunîst % 5.46 (Mebûs)

- PASOK % 4,71 (Mebûs)

- Yewnanên Serbixwe % 4,71 (13 Mebûs)

Rêberê Syrizayê Alexis Tsipras dibêje gere 320 mîlyon Euro deynên Yewnanistanê bêne betalkirin ku ev yek Yekîtiya Ewropayê (YE) ditirsîne. Tsipras dixwaze têkiliya bi YE'yê ji nû ve bêne sazkirin. Beramberî wê Partiya Demokrasiya Nû ku rêberê wê Antonis Samaras e dibêje ku aborî baş bûye, lewma divê bernameya aboriyê ya YE'yê ew bidomînin.

Rêberê To Potamî Stavros Theodorakis ji bo çêkirina koalîsyonek ligel Syrîzayê derî vekirî hişt û got: "Hê zû ye em qala van kîteyan bikin."

Syrîzayê ji Twitterê daxuyaniya yekemîn da û got: "Hêvî bi ser ket".

Li Yewnanistanê rêjeya bendavê sedî 3 ye.