Amed

Hevdîtina Hunerî ya Navneteweyî ya Kurdistanê ku bi mebesta piştgiriya bi rojavayê Kurdistanê re tê lidarxistin û berhemên wênesazên ji Asya, Ewropa, Afrîka, Amerîka û çar parçeyên Kurdistanê têde têne pêşkêşkirin dest pê kir. Di vê çarçoveyê de sempozyûmek li dar ket û 33 wênesaz beşdar bûn.

Rojên Hunerî yên Kurdistanê bi piştgiriya Şaredariya Bajarê Mezin a Amedê, Şaredariya Kayapinar, Baglar, Sûr û Yenîşehrê bi mebesta piştgiriya bi rojavayê Kurdistanê re dest pê kir. Bername bi sempozyûma li Salona Resepsiyonê ya li Sumerparkê dest pê kir. Hevşaredara Bajarê Mezin a Amedê Gultan Kişanak, Hevşaredara Yenîşehrê Ulku Baytaş, Cîgira Şaredar Gulistan Nazlier Koyuncu,ji Komîsyona Çandê ya Meclisa Şaredariya Bajarê Mezin Hulya Turker, Serokê Daîreya Çand û Turîzma Şaredariya Bajarê Mezin Muharrem Cebe û Midûra Çand û Turîzmê Cehavir Sadak Duzgun beşdar bûn.

Hunermend Ahmad Hussein Elzaaim, Ali Asker Bal, Aziz Tilki, Bahar Demirtaş, Bahram Hajou, Bariş Seyitvan, Dilşad Questani, Eido Alhussein, Ergin Kaya, Êvar Husseynî, Hama Haşim, Hanif Hamou, Hasan Abdalla, Inayat Attar, Lokman Huseyin, Metin Çelik, Mourad Abdullaoi, Munîr Şêxê, Newroz Azizoglu, Nursun Hizlan, Omran Younis, Rania Kakarli, Rana Ali Abbas, Rêbuvar Said, Remzi Sever, Reshid Husso, Ridvan Kuday, Saleh Nemir, Samr Draie, Sitar Ali, Şengul Acil, Zouheir Hassib û Walid Alagha beşdarî sempozyumê bûn û dest bi çêkirin wêneyên xwe kirin.

Berhemên 230 wênesazan tê pêşkêşkirin

Munîr Şêxê ku di komîteya amadekirina Pêşangeha Kurdistanê de ye bixêrhatina mêvanan kir û behsa girîngiya vê xebata ku dê ji bo piştgiriya Rojava bê pêkanîn kir. Şêxê bal kişand ser girîngiya vê çalakiya ku hemû parçeyên Kurdistanê tê de beşdar in û behsa amadekirina wê kir.

Koordînatorê Galeriya Hunerê ya Amedê ya Şaredariya Mezin Bariş Seyîtvan jî da zanîn ku cara yekem e li Amedê xebateke wiha tê kirin û got: “Îro ji çar aliyên cîhanê û çar parçeyên Kurdistanê hunermendên hêja li vê derê bi me re ne. Ev xebat ji bo me pir girîng e.” 

Seyîtvan got ku pêşangeh dê heta 7'ê reşemiyê bê vekirin û 230 hunermend dê berhemên xwe tê de pêşkêş bikin. Seyîtvan got ku ew dixwazin bernameyên bi vî awayî zêdetir bêne lidarxistin. 

Hunermend Înayet Attar bi ser navê hunermendên beşdar behsa girîngiya vê hevdîtinê kir û got: “Em dixwazin ev xebata me ji bo siberojê bibe model.”

Bi hunerê giyanê xwe pak bikin

Hevşaredar Gultan Kişanak jî axaftina xwe bi kurdî kir û got: “Hûn hemû bi xêr hatine Amedê, vî bajarê qedîm, pirçandî, pirzimanî. Em bi dîtina we ya li vê derê gelekî kêfxweş in.” 

Kişanakê bal kişand ser girîngiya vê xebatê û got: “Hûn li vê derê mêvan nîn in, hûn li mala xwe ne. Ev bajar, bajarê we ye.” 

Hevşaredar Kişanak bal kişand ser rola bajarê Amedê û wiha dom kir: “Bajarê Amedê her du aliyê Firatê anî cem hev. Hatina we ya vê derê di navbera çandan de dibe pire û her du aliyên Firatê digihîne hev. Sempozyuma îro, pêngava yekem a Hevdîtina Hunerî ya Kurdistanê ye.”  

Kişanak daxuyand ku hunermendan mîsyoneke girîng daye ser milên xwe û ev yek lê zêde kir: “Bi xêra we gel bêhtir ji hev du hez dikin, tenê, hezkirin dikare çewtî û xeletiyên dîrokî serast bike. Em dikarin bi saya hunerê giyanê xwe pak bikin. Ji ber vê ev hevdîtin gelekî girîng e.”

7'ê mehê dê pêşangeha ji berhemên hunermendan bê vekirin û ew berhem ji bo alîkariyê bêne firotin. Pêşangeh heta 7'ê adara 2015'an dê vekirî be.