Diyarname
Di Festîvala San Sebastian de Yeşîm Ustaoglu bi “Pandora’nın Kutusu” xelata Îstîrîdyeya Zêrîn, Semîra Mexmelbaf jî xelata taybet girt.

56’emîn Festîvala Fîlman a San Sebastianê îsal di 18’ê vê mehê dest pê kir û 27’ê mehê bi dawî bû. Di festîvalê de di bin serokatiya derhênerê amerîkî  Jonathan Demme de jurî ji  Michael Ballhaus, Martina Gusman Urruti, Masato Harada, Nadine Labaki, Clare Peploe û Leonor Watling pêk dihat. Juriyê xelata mezin a festîvalê Îstîrîdyeya Zêrîn da derhêner Yeşîm Ustaoglu. Fîlmê Ustaoglu “Pandora’nın Kutusu” (Qûtiya Pandorayê) wekî fîlmê herî serketî hat hilbijartin. Di festîvalê de lîstikvana heman fîlmê Tsilla Chelton tevî Mesissa Leo (bi rola di fîlmê Frozen River de) xelata Lîstikvana Herî Serketî bi hev re par ve kir.
Di fesTîvalê de derhênerê îngilîz Michael Winterbottom bi fîlmê xwe “Genova” xelata Derhênerê Herî Serketî, derhênera îranî Semîra Mexmelbaf jî bi fîlmê xwe “Asbe du-pa” (Hespê du ling) Xelata Taybet a Juriyê girt. Her wiha lîstikvan Oscar Martinez jî bi rola xwe ya di fîlmê “El nido nido vacio” xelata Lîstikvanê Herî Serketî girt.

“Qutiya Pandorayê” bi xelatan vedibe

Di fîlmê derhêner Yeşim Ustaoglu de Tsilla Chelton, Derya Alabora, Ovul Avkiran, Onur Unsal û Osman Sonant dilîzin. Fîlmê ku hê li Tirkiyeyê nehatiye nîşandayîn li dinyayê xelatan berhev dike jî.
Derhêner Ustaoglu ku li ser pirsgirêkên civakî fîlman dikişîne heta niha  “Bir Ani Yakalamak” (1988), “Magnafantagna” (1989),  “Duet” (1990), “Otel” (1992), “Îz” (1994) , “Guneşe Yolculuk” (1998), “Bulutlari Beklerken” (2003) kişandine. Ew niha jî bi “Pandora’nin Kutusu” ku senaryoya wê Ustaoglu û Sema Kaygusuz nivîsandiye di rojevê de ye.
“Qutiya Pandorayê” li ser çîroka sê xwişk û birayan e. Ew dema dibihîzin dêya wan a extiyar winda bûye, ber bi navçeyeke biçûk a Rojavayê Behra Reş de diçin. Di rê de pirsgirêkên wan û xirecira di navbera wan de derdikeve holê, dema digihîjin ber diya xwe ya ku pê hesiyane bi nexweşiya Alzheimerê ketiye ew vê carê xwe dikişînin ber lêpirsînê. Dema Qutiya Pandorayê vedibe di navbera dayik û neviyê wê de nêzîkbûneke dertê holê.
Fîlmê du di 2006’an de li Festîvala Fîlman a Selanîkê xelat girt, li Tirkiyeyê dê di Festîvala Fîlman a Porteqala Zêrîn ya li Antalyayê de (10-18 rezber 2008) jî bê nîşandayîn.

Ji ‘Textê Reş’ heta ‘Hespê du ling’

Derhênera îranî Semîra Mexmelbaf ku bi fîlmê xwe “Asbe du-pa” (Hespê du ling)” Xelata Taybet a Juriyê girt heta niha şanenava xwe avêtiye bin fîlmên: “The Apple” (Sêv), “Textê Reş”, “God, Construction and Destruction as part of 11'9''01 September 11 (11 Rezber), “Piştî nîvro saet pênc”.
Mexmelbaf li Tirkiyeyê û di nav kurdan de zêdetir bi fîlmê Textê Reş  tê nasîn û ew keça derhênerê navdar Muhsîn Mexmelbaf e.
Semîra Mexmelbaf “Textê Reş” li ser têkoşîna jiyanê ya kurdên ser sînorê başûr û rojhilat a piştî komkujiya Helebçeyê kişandiya. Mamosteyên ku textên reş li ser pişta wan e gund bi gund digerin ku dersê bidin zarokan û bi vî awayî jî jiyana xwe didomînin. Fîlmê bi kurdî li dinyayê gelek hat ecibandin û di sala 2000’î de li Festîvala Fîlman a Cannesê Xelata Taybet a Juriyê girt. Her wiha digel xelatên ku li Îtalya û Amerîkayê girt, ji UNESCO’yê jî Xelata Taybet a Çandê girt. Mexmelbaf bi fîlmê xwe yê nû jî yekem xelata xwe girt.