Diyarname

Hevserokê HDP'ê Selahattin Demirtaş li ser 10 xalên ku li Îmraliyê li ser hatine axivîn sekinî û ew xal eşkere kirin:

1- Divê naveroka siyaseta demokratîk bê nîqaşkirin.

2- Ger em çareseriya herêmî û neteweyî ya çareseriya demokratîk nîqaş bikin.

3- Ji aliyê zagonî û demokratîk ve ewlehiya hemwelatiya azad.

4- Têkiliya siyaseta demokratîk a bi dewlet û civakê re û sernavên li ser sazîkirina vê yekê.

5- Asta civakî - aborî pêvajoya çareseriyê.

6- Rewşa ewlehiya nû ya ku pêvajoya çareseriyê dê bi xwe re bîne.

7- Dê ewlehiya zagonî ya pirsgirêkên jin, çand û ekolojiyê çi be?

8- Li ser pênaseya nasnameyê sazkirina mekanîzmayên hevbeş.

9- Pênasekirina bi pîvanên demokratîk a milet, welatê hemdem û komara demokratîk.

10- Zagona Bingehîn a nû ku hemû gavên demokratîk bigire nava xwe.

Demîrtaş got ku Ocalan xwestiye pêşî ev deh xal bêne nîqaşkirin, çarçoveyek bê sazkirin paşê li ser destjêberdana çekan bê axivîn, lê hikumetê xwe nedaye ber vê yekê, hikumet dixwaze serê pêşî çêk bêne berdan. Demirtaş wisa dom kir: "Hikumet HDP'ê sûcdar dike û dibêje 'Ocalan banga destjêberdana çekan daye, lê HDP vê eşkere nake.' Gere hikumet dest ji vê zimanê ku HDP'ê sûcdar dike berde. Em peywira xwe tînin cih. Di pêvajoyê de em dirust tevdigerin. Bila her kes aram be em agahiyên şaş nadin kesî. Em bi hesret, bi hêvî aştiyê dixwazin."

Demirtaş êvarê beşdarî CNN Turkê bernameya Ahmet Hakan "Tarafsiz Bolge" bû û li ser gelek xalan sekinî.

Vane hin not ji axaftina Demirtaş:

- Ger destûra PYD'ê neba operasyona Şam Firat a ji bo Turbeyê dê nikaribana bikin. PYD ji aliyê Tirkiyeyê ve ne tehdîd e, lê ligel vê yekê jî ger hûn ji PYD'ê re bibêjin rêxistina terorê wê çaxê di polîtîkaya we ya derve de şaşiyek heye.

- Tu eleqeya Paketa Zagona Ewlehiya Navxweyî û azadî bi hev re tune ye. Îro di rojnameyan de hebû, li Mêrsînê 4 zarok par ji ber ku molotof avêjte cezayê muebedê ji bo wan tê xwestin. Niha jî molotof sûc e. Em nabêjin bila molotof serbest be. Hikumetek ew qas  derewan dike nabe.

- Em dijî pergala Serokdewletî ne. Ne cureya Meksîka, ne Amerîka, em dijî hemû pergalên Serokdewletê ne.

- Ez nikarim bibêjim me bendav derbas kir, em rehet in lê bi ser rêyên ku em bigirin de zêdetir hêvî heye. Em bendavê derbas bikin emê herî hindik 55 mebûsî bi dest bixin. Hinek din dengên me zêde bin ev hejmar dê zêdetir be.

- Em bendavê derbas bikin û hinek din zêde dengan bigirin, îhtîmal e AKP bi qasî ku nikaribe hikumetê çêbike mebûsan bi dest bixe. Niha mesele ew e, loma dest bi planên qirêj kiriye.

- Li Amedê, li Batmanê, li hin cihan diçin derdorên ku em bi wan re axivîne tehdîd dikin.

- PKK ne bi AKP'ê, bi xurtbûna HDP'ê re dê dest ji çekan berde. HDP bi awayekî xurt bikeve meclisê, rêya siyasetê bê vekirin wê çaxê dê PKK dest ji çekan berde.

- Di 2002'yan de AKP dema hat hêvî belav dikir, niha ew hêvî xilas bû. Em dibêjin bila civak ber bi rewşeke baştir ve here, em AKP'yek din çênakin. Em xêza rastîn a guherînê çêbikin. Em Erdoganek nû dernaxin, em dibêjin bila civak bi awayekî kolektîf desthilatdariyê saz bike. Em alîgirê kedê ne, xeta çep in, em bi awayekî adilane parvekirinê bikin.

- Dengîr Mîr Firat dit ku çiqas talûkeya mezin heye, wî ev talûke dît loma beşdarî partiya me bû. Me ew vexwend, wî got ez nebim mebûs, me xwest bibe. Em derdorên cuda yên Tirkiyeyê li dor rêgezên me rêz kirine tînin ba hev.

- Emê berendamên xwe yên mebûsiyê bi pêşnirxandinan, li gor rewşa wan a li bajaran, dema em bendavê derbas bikin li meclisê dê performanseke çawa nîşan bidin, li gor van xalan emê diyar bikin. 

- Hin derdor niha li ser dixebitin ku em û MHP bi hev re şer bikin. Wisa nebe dê cawa 400 mebûsan bi dest bixin? Gere HDP û MHP bendavê derbas nekin ku 400 mebûsî bigirin. Niha li ser vê planan çêdikin.