HEWLÊR (DÎHA)

Li Parlamentoya Başûrê Kurdistanê, di dema rûniştina taybet a li ser pirsgirêkên malî yên herêmê de, pevçûn derket. Du wekîlên Partî Demokratîk Kurdistan (PDK) li parlamenterê Tevgera Goran Elî Heme Salih xistin.

Nûçegihanekê parlamentê der barê mijarê de agahî da raya giştî û anî ziman ku bi destpêkirina rûniştinê re parlamenterê Tevgera Goran Elî Heme Salih mafê axaftinê girt û li ser mijara Serokatiya Herêma Kurdistanê ya di demeke nêz de wê dema wezîfeyê bi dawî bibe, nêrînên xwe anî ziman. Lê belê du parlamenterên PDK'ê di rûniştinê de bi awayekî fîzîkî dest li Salih werdan. Di pevçûnê de wekîlên PDK'ê bi kulman li parlamenterê Tevgera Goran dan.

Parlamenterê YNK'ê Goran Azad diyar kir ku nîqaşa parlamenteran normal e, lê bûyera îro qewimî yekemcar li Parlamenta Kurdistanê diqewime.

Goran Azad da xuyakirin ku piştî bûyerê Serokatiya Parlamentê biryar da ku her du wekîlên PDK'yî yên bûyer derxistin, tevlî rûniştinê nebin. 

Êrîşa li dijî Elî Heme Salih bi plan bû

Li ser bûyerê Parlamentera Tevgera Goran Êvar Îbrahîm axivî û diyar kir ku lêdana parlamenterê Tevgera Goran bi plan kiriye û wiha got:"Berê axaftin li ser hatiye kirin. Karê parlamenterên PDK’ê kirî bêrêziya li hemberî rûmeta Parlamentoya Herêma Kurdistanê ye.”

Parlamenterê Yekitiya Nîştimaniya Kurdistanê (YNK) Rêbaz Fayîq bertek nîşanî êrîşê da û wiha got:"YNK li gel aramiya pirsgirêkên di navbera parlamenterên Herêma Kurdistanê de ye. Ev bûyer bi destpêkirina rûniştina parlamentoyê re pêkhat. Parlamenterên PDK’ê bi kulm êrîş kirin.”

(Wêne: Arşîv)