Diyarname
Hevserokê DTP’ê Ahmet Turk beşdarî kongreya Partiya Sosyalîstên Ewropayê (PES) dibe û dê bi Serokwezîrê Spanyayê re jî bê cem hev.

Kongreya PES’ê (Party of European Socialists) îro dest pê dike û heta 2’yê meha pêşiya me dê bidome. Ji Tirkiyeyê DTP jî bi pênasa endam vexwendiyê kongreyê ye.

Kongre di heman demê de tê wateya amadehiyên ji bo hilbijartina Parlemena Ewropayê ya pûşpera 2009’an. Di kongreyê de li ser edaleta civakî û refahê dê sosyal demokrat, çep û çepgirên Ewropayê nîqaş bikin.

Serokwezîrên şeş welatan ku çepgir an sosyalîst in beşdarî kongreya ku li Madrîdê li dar dikeve dibin. Spanya mazûvanî ji bo kongreyê dike û tê hêvîkirin ku Hevserokê DTP’ê Ahmet Turk û Serokwezîrê Spanyayê Jose Manuel Zapatero hevdîtineke pêk bînin.
Li ser navê DTP’ê  Hevserokê DTP’ê Ahmet Turk û Berpirsa Têkiliyên Derve Mebûsa Stenbolê Sabahat Tuncel beşdar dibin. Turk di heman demê de amadehî dike ku di rojeva Demokrasî û Azadiyan de dê axaftineke bike.