Diyarname
Li ser êrîşa ku çeteyên DAIŞ'ê li hemberî Kobanî pêk anî kîte hêdî hêdî eşkere dibin. Hevserokatiya Konseya Rêveber a KCK'ê daxuyaniyeke nivîskî weşand û qala hin kîteyan kir.
Vaye ji wê daxuyaniyê çend kîte:
- Di sibeha 25'ê pûşperê de, 50-60 çeteyên faşîst ên ji sînorê Tirkiyeyê û ji aliyê başûrrojava ve bi du baskan xwe berdan nava Kobanê; bi dehan mirovên sivîl qetil kirin, bi dehan mirov birîndar kirin. Çeteyên faşîst ên li hemberî YPG û YPJ'ê her têk diçin, di meha pîroz a Remezanê de bi qetilkirina gelê sivîl ê Kobanê re xwestine rovanşa vê têkoşîna xwe werbigirin. Ev êrîş nîşan didin bê çeteyên faşîst çiqasî tengav bûne. Ev çeteyên li dijî mirovahiyê yên êrîşî gelê sivîl dikin, gelê sivîl rehîn digirin, wê hesabê van êrîşan mutleq bidin.
- Em mirovên di êrîşan de jiyana xwe ji dest dane bi rêzdarî, mînetdarî û bi rehmet bibîr tînin ji birîndaran re jî şîfa xêrê dixwazin.
- Ev êrîşên li hemberî gelê me tên kirin, wê nikaribin pêşî li azadbûna Kurdistanê bi taybetî jî Rojava û Sûriyeyê bigirin. Wê nikaribin pêşî li demokratîkbûyîna Rojhilata Navîn bigirin. Gelê Kurdistanê yê di jiyana azad de bi biryar e, wê bi xwe re tevahiya Rojhilata Navîn demokratîk û azad bike.
- Hemû dewlet û hêzên siyasî yên destekê didin DAIŞ'ê berpirsyar in. Di serî de dewleta Tirk û hikumeta AKP'ê berpirsyar in. Yên van êrîşan teşwîq dikin û normal nîşan didin, yên dibêjin 'PYD ji DAIŞ'ê xeteretir e'. Wekhevnîşandana YPG/YPJ a gelê xwe diparêze û çeteyeke faşîst a êrîşî her kesê ne ji xwe dike, karaktera dewleta Tirk û asta dijminatiya li Şoreşa Rojava nîşan dide. Di rewşeke ku hînê gotina 'PYD ji DAIŞ'ê xeteretir e' di hişê mirovan de ye de, veşartina hêzên li pişt van êrîşan, ne pêkane.
- Çeteyên faşîst ji du aliyan ve ketine bajar. Yek ji van li rojhilatê Kobanê ji sînorê Tirkiyeyê hatiye kirin. Ev jî kampên çeteyan yên aliyên Kaniya Xezalan nîşan didin. Hemû cîhan dizane ku li Kaniya Xezalan çete bi rêxistunên îstîxbarata dewleta Tirk re leşker û polîsan re di nav hev de ne. Dewleta Tirk a li Kaniya Xezalan bi çeteyan re di nava hev de ye, dibêje ‘tu eleqeya me bi çeteyên ji sînor derbas bûne tune’ ev dereweke mezin e û înkarkirina hevkariya sûc e. Dewleta Tirk heta nîha kîjan têkilî û desteka xwe ya bi DAIŞ’ê re eşkera kiriye ku wê niha vê bike! Divê tu kes nekeve nava bendewariyan ku dewleta Tirk têkiliya xwe ya bi DAIŞ’ê re, hevkariya xwe ya sûc îtîraf bike. Dewleta Tirk duh çawa înkar kir, wê niha jî înkara xwe bidomîne.
- Bila hemû gelên cîhanê, Rojhilata Navîn û Tirkiyeyê zanibin ku keç û xortên fedaî yên gelê me yên ji bo azadiyê têdikoşin, wê miheqeq hesabê vê komkujiyê bipirsin. Tu kes wê nekaribe îradeya jiyana demokratîk û azad a gelê me bişikîne. Şoreşgerên Rojava jî bi têkoşîna xwe ya destanî wê Kurdistanê azad bikin û Sûriyeyê demokratîk bikin. Wê bersiva herî baş bidin çeteyên faşîzan û destekvanên wan. Bîranînên şehîdan wê bi jiyana azad û demokratîk bê tacîdarkirin.”
PYD: Divê berpirsyarên komkujiyê li gor hiqûqa navneteweyî bên darizandin
Di vê navberê de Desteya Rêveber a PYD’ê jî komkujiya Kobanê ku li dijî sivîlan pêk hatiye şermezar kir û bang li hêzên navdewletî kir ku komîteya lêpirsînê ava bikin û kesên destê wan di komkujiyê de hebin li gorî qanûnên navdewletî bêne darizandin.
Li gelek cihan çalakiyên şermezarî
Di serî de li Amed, Stenbolê li gelek cihan çalakiyên şermezarkirina êrîşa li hemberî Kobanî li dar ket. Bi hezaran kesî êrîşa çeteyên DAIŞ'ê şermezar kirin.
Her wiha roja 27'ê mehê Hevseroka HDP'ê Figen Yuksekdag, mebûsên HDP'ê û bi hezaran kes dê herin ser sînorê Pirsûs-Kobanî û bûyerê şermezar bikin.
120 şehîdên Kobanî hatin definkirin Li gorî nûçeya ANHA'yê ji 152 welatiyên ku di êrîşên çeteyên hov ên DAIŞ’ê yên li ser Kobanî de jiyana xwe ji dest dane cenazeyên wan hatin definkirin. Cenazeyên şehîdan ji aliyê Saziya Malbatên Şehîdan, xizmên welatiyên ku hatine qetilkirin û şêniyên bajar ve li goristana rojavayê bajar û gundê Helincê hatin definkirin. Cenazeyên 72 welatiyan li goristan li rojavayê bajar ku di dema berxwedana dîrokî ya Kobanî de hatibû avakirin û welatiyên di berxwedanê jiyana xwe ji dest dane lê hatine definkirin û cenazeyên 48 kesan jî li gundê Helincê yê li rojhilatê bajar hatin definkirin.
**
Nûçeyên eleqedar:
- HDP'ê 'êrîşên DAIŞ'ê ji hikumetê pirsî
- 'Ji bo Kobanî bibin mertalên zindî'
- Çeteyên DAIŞ'ê ji Tirkiyeyê ketin Kobanî û sivîl qetil kirin
.jpg)
