Diyarname
Hunermend Rojîn ji bo xebatê bersiveke erê dabû TRT 6'ê. Wê îro çima bersiva erê daye daxuyaniyeke da.

Heta niha hin nerazîbûn li hemberî kurdên ku ji bo TRT 6'ê dixebitin derketin holê. Ji her derdorî dengekî dertê. Hunermend Rojîn jî îro daxuyaniyeke şand û çima bersiva erê ji bo TRT 6'ê daye bersivand. Em bêyî destê xwe bidin daxuyaniya wê, em pêşkêş dikin:

"Çima "Erê" ji Bo TRT 6'ê?
Bi weşana testê re TRT 6 dibe mijara gotûbêjên dijwar. Ev tişt ne xerîb bû û xweş dihat texmînkirin. Çima? Ji ber ku bi deh salan e ziman û çanda kurdî di bin giraniya zagonên qedexeyan de dijî. Ji ber ku bi zimanê xwe yê zikmakî axifîn bi mîlyonan însan li hember nexweşiyên bê sînor hatin. Bêguman vê rewşa tirş û tal psîkolojiyeke bêbaweriyê di hundirê gel de avakiriye li hember hemû livên dewletê. Mirov dikare vê tiştê xweş fêm bike.
 
Gelek kes vê livê mîna pêwîstiyekê dibînin ji bo çiyayên ji cemedê yên di navbera her du gelan werin helandin û ji bo nêzîkbûnên çewt ên heta niha li hemberî gelê kurd hatine pêkanîn werin berevajîkirin. Lê hinek jî vê yekê mîna lîstikeke hilbijartinan dinirxînin û tu cidiyetê tê de nabînin. Bila lehiyên ji nêrînên cuda û curre curre di rûpelên rojname û kovaran de û di ekranên televîzyonan de cih bigirin. Ev yek jî pêwîstiyeke bingehîn e ji pêwîstiyên demokrasiyê. Lê belê, tehdît, xwe-ferzkirin û gotinên tûj mîna "xwefiroş" û "xayîn" têzên kevn in û sedsal li ser re derbas bûne.

Ez bi xwe di wê baweriyê de me ku Tirkiye gihaye qonaxekê dest bi avêtina gavên piçûk bike. Ger em van gavên piçûk bikar neynin, dibe ku em gavên mezin jî winda bikin. Ez li vir im ji bo hêjayên gelê xwe yên çandî û civakî pêşde bidim. Ezê tu caran di saziyekê de xebatê nekim ku hewil bide xwe, rûmeta gelê min birîndar bike û hêjayên wî piçûk bike. Ger em dest bidin hev û vê pêvejoyê pêşde bidin, di demeke ne dirêj de emê bikaribin psîkolojiya di kolanên Tirkiyeyê de biguherin û hêlîneke nû ji nasnameya xwe re di vê civakê de ava bikin.

Lewma ez dibêjim "erê" ji bo TRT 6'ê!

Ligel rêz û silavan

28.12.2008,
Rojîn"

***

Nivîskarên Diyarnameyê jî meseleya TRT'ê nirxandin. Vane nivîsên nivîskarên me:

Cemil Oguz: TRT kurdî dê çi li jiyana min zêde bike?

Şêxmûs Sefer: Te got ÇEND TV?

Evdile Koçer: Çend pêşniyar bo TRT Kurdî!

Şengul Ogur: TRT 6, Kurdolojî û pozîtîvîzma tirk û guherîn