Li Swêdê çepên sosyal demokrat kurdeke ciwan wekî berendama Parlemena Ewropayê nîşan da.

Di salên dawî de eleqeyeke mezin ji bo kurdan heye di hilbijartinên ji bo Parlemena Ewropayê (PE) de. Hilbijartinên ji bo PE'yê dê meha pûşperê de li dar bikevin. Ji niha de berendam jî diyar dibin. Li Swêdê kurdeke ciwan Evîn Çetin (24) wekî berendama hilbijartina ji bo mebûsiya YE'yê hate nîşandayîn. Ger Çetin bê hilbijartin dê bibe yekem jina kurd ku li Swêdê ji bo mebûsiya PE'yê tê hilbijartin.

Partiya çepa soysal demokrat Evîn Çetîna ku bi eslê xwe ji Girêmîra ya Nisêbîna Mêrdinê ye wekî berendam nîşan da û niha ji hilbijêrên kurd û swêdî li benda dengan e.

Evîn Çetîn di nav lîsteya partiya sosyal demokrat de di rêza 29'an de ye û ji Swêdê 18 kes ji bo PE'yê têne hilbijartin. Di hilbijartina berê de sosyal demokratan karibû 5 mebûsan bişînin. Dema bi vî awayî mirov li meseleyê binêre karê Çetîn zor e, lê tê gotin ku kurdên Swêdê dengên xwe bidin wê dê karê wê hêsantir be.
Tam nayê zanîn ku li Swêdê çend hezar kurd hene lê heta çend sal berê texmîn ew bû ku li dor 25-30 hezar kurdî li Swêdê dijî. Bi koçê re ev hejmar zêde bûbe jî hê nayê zanîn çend kurd xwedî bikaranîna dengan in.

Ji ANF'ê hatiye girtin