Diyarname
Çalakiya 'Ji çar welatan helbestvanên jin ên kurd tên ba hev' dê li Stenbol û Amedê li dar bikeve.

Weşanên Avestayê di bin navê "Şahmaran" de heta niha li dor 10 pirtûkên jinên kurd weşandin. Di nav beşê de pirtûkên helbest û çîrokan cih girtin.
Niha jî bi hevkariya Anadolu Kultur, Weşanên Avesta, Balyozxaneya Swêdê û BEKSAV'ê 'Ji çar welatan helbestvanên jin ên kurd tên ba hev'.

Ji Îran, Iraq, Sûriye û Tirkiyeyê pênc helbestvanê jin ên kurd ji bo helbestxwendinê li Stenbol û Amedê dê bên bav hev. Helbestvanên jin Fatma Savci, Gulîzer, Jana Seyda, Kejal Ahmed û Nahîd Huseynî ku bi zaraveyên soranî û kurmancî berhemên xwe dinivîsin ji bo derbirîn û vejandina kevneşopiya şiîra hevpar ku îfadeya kultur û bîra gelê kurd e, dê dengên xwe bikin yek.
Di civînê de helbestvanên kurd dê bi kurdî helbestên xwe bixwînin û Julide Kural jî dê wergera helbestan bi tirkî bixwîne.
Her wiha Rûken Bagdu Keskin û Lorîn S. Dogan  jî dê bi axaftine beşdarî çalakiyê bibin.

Ji bo çalakiyê amadekaran daxuyaniyeke bi vî rengî da: "Edebiyata kurdî ku hem ji aliyê devkî hem jî ji aliyê nivîski ve xweyî rabirduyeke resen e, di nav zaravayên xwe de kuliyateke berfireh jî dinehwirîne. Şaîirên jin hem di kevneşopiya vebêjê ya devkî hem jî di ya nivîskî de cihekî girîng digirin. Balkêş e ku her çiqas şaîirên ku dê beşdarê şiîrxwendin û panelê bibin, ji dewletên cuda û ji aliyê kulturî û civakî ve ji derdorên cihê jî bên, şiîrên wan dengekî hevpar û hestiyariyeke  nêzî hew radigihînin. Pêkanîna çalakiyê di çarçoveya '8'ê Adarê Roja Jinan a Cîhanê' de, girîngiyeke cihê dide van şiîran ku ji aliyekî ve jî daxuyaniya serîrakirina jinên kurdan e li dijî zordariyên civakî, kulturî û polîtîk."

Bernameya çalakiyê:

- 20. 03. 2008, saet 18:00, Salona Şanoyê ya Şaredariya Bajarê Mezin a Amedê
- 22.03.2008, saet 17:00, Depoya Titûnê ya Stenbolê (Hendek Cad No:12 Tophane)
- 23. 03. 2008, saet 17:00, BEKSAV Stenbol (Damga Sokak no: 17/5 Kadikoy)