Henîfe Hisên

Ji bo em Cenevre 3 fêm bikin, divê em binêrin ku Cenevre 1 û Cenevre 2 çawa çêbûn. Ji destpêkê ve wekî Tevgera Azadiyê me got bila şoreşa Sûriyeyê nebe çekdarî û destwerdana derve çênebe. Lê ji ber bê îradebûna muxelefeta Sûriyeyê ku xwe spartin dewleteke mîna Tirkiyeyê ku di tevahiya dîroka xwe de tevger û kesayetên şoreşger tesfiye kirine, encam çi bû li holê ye. 

Bûyerên Cisir el Şixor çêbûn, rêjîmê jî dest bi şer kir li beramberî şoreşa Sûriyeyê. Hemû grûbên şoreşger ên Artêşa Azad qels bûn, lawaz man. Di encamê de Cebhet el Nusra derket ser dikê û hemû grûbên Artêşa Azad tesfiyekirin. Paşê Cenevre 1 çêbû. Wê demê jî me wekî tevger pir hewl da em mekanîzmeyek kurdî çêkin ku em wekî kurd bi dengekî beşdar bibin. Lê, PDK û Tirkiyeyê lihevkirin ku ENKS bê PYD çêbikin ew ê wan beşdarî civînên navneteweyî bikin. Bi rastî jî wiha bû, lê ew beşdar nekirin. Me têkoşîna xwe berdewam kir. Me ji meclîsa gel bi dengê gel çêkir. Me got ev şer ne şerê me ye em ê xwe biparêzin. Li ser vê me hêza xwe ya parastinê çêkir. Li ser vê yekê ên navên wan Artêşa Azad in dest ji rejîmê berdan û êrîşî me kirin, me jî li ber xwe da. Şerên Serêkaniyê, Qestelê û Helebê çêbûn. Em di van şeran de bi ser ketin. Lê ew li derveyî Cenevreyê man. 

Paşê amadekariyên Cenevre 2 dihat kirin, me desteya bilind ya Kurdî ava kir. Şoreşa 19 Tîrmehê pêk hat. Tam me nîqaş dikir ku em wek kurd beşdar bibin. Lê cardin Tirkan û PDK li hev kirin ku bêyî me biçin û beşdarî koalisyonê bibin, tenê ji bo yekitiya Kurdan çênebe. Dîsa li wan guhdar kirin desteya bilind xirab bû, lê dîsa ew nebirin civîna Cenevreyê. Me cardin têkoşîna xwe berdewam kir, me rêveberiya xweseriya demokratîk li ser sê kantonan îlan kir. 

Paşê şerên tên zanîn li tevahî kantona Cizîrê û Kobanê şerên mezin qewimîn. Komkujiya Şengalê çêbû, me weke Rojava 200 hezar kurdên Êzîdî ji komkujiyê rizgar kir, li Kobanê berxwedana sedsalê çêbû. Hêzên navneteweyî bi me re ketin tifaqê. Rûsya hat Sûriyeyê. Tevî van hêzan bi me re di nava kar de ne, me jî li Rojava Kongreya Sûriyeya Demokratîk ava kir. Lê cardin ji ber tehdîdên Tirkiyeyê ji milê din ve demokrasiya Ewropa û berjewendiyên koalisyonê û Rûsan, gelên Bakurê Sûriyeê beşdar nekirin. 

Dem em li rewşê binêrin, dîrok her xwe dubare dike. Amerîka bi temamî li gorî berjewendiyên xwe nêz dibe. Niha DYA çi kir, dixwaze blokên heyî belav bike. Naxweze ji bilî wan kes li ser Sûriyeyê xwedî gotin be, ji milekî ve ambargo ji ser Îranê rakir ku xurt bibe, bi wan eniya Sunnî zeîf bike. Ji milekî ve ji bo Tirkî bikişîne ser xeta xwe ku li dijî DAÎŞ bide şerkirin. Ji bo wê qebûl kir ku bi PKK’ê re şer bike ji bo piştgiriya Rojava neke, Rojava jî qels bibe û muhtacî DYA’yê be. 

Ji me re jî dibêje, nexeyidin vê carê nebû careke din. Lê em jî dibêjin ku em ne Kurdê berê ne. Em beşdar nebin em pir tiştî wenda nakin, lê biryarên Cenevre bigire wê li bakurê Sûriyeyê derbas meriyetê nebin, ji ber ku yên li dijî DAÎŞ’ê heya niha serkeftin bi dest xist tenê em in, axa ku niha di bin destê me de ye, ji ya destê rêjîmê de jî, ya di destê grûbên din de jî bêtir e. 

Ger li ser vê axê biryarên Cenevrê pêk nehatin, ew kongre ne serkeftî ye. Em weke gelên li bakurê Sûriyeyê emê têkoşîna xwe berdewam bikin. Hûn civînan çêkin em ê jî Sûriyeyê azad bikin û demokratîk bikin, li beramberî dîrokê hûnê rûreş bin.

jindasilan@gmail.com

01.02.2016, Yeni Ozgur Polîtîka