AMED
Navenda Giştî ya KURDÎ-DER'ê bi boneya 21'ê Reşemî Roja Zimanê Zikmanî yê Cîhanê daxuyanî da. Sekreterê Giştî yê saziyê M.Nurî Aydogan got ku pirsgirêka ku 93 sal in wekî pirsgirêka kurd tê binavkirin, di rastiya xwe de pirsgirêka zimanê kurdî ye û got: "Heke zimanê Kurdî azad bibe, dê pirsgirêka Kurd jî çareser bibe."

Navenda Giştî ya KURDÎ-DER'ê li ber avahiya saziyê daxuyanî da çapemeniyê. Ligel rêveber û endamên KURDÎ-DER'ê, xebatkarên rojnameya Azadiya Welat, Weşanxaneya Aramê û gelek xwendekarên KURDÎ-DER'ê tevlî daxuyaniyê bûn. Daxuyanî ji aliyê Sekreterê Giştî yê KURDÎ DER'ê M.Nurî Aydogan ve hat xwendin. Aydogan diyar got ku ev 93 sal in di serî de gelê kurd, zimanê gelan qedexe dikin, li Sûrê çand, dîrok û baweriyên gelan tune dikin û dûre jî dibêjin gel birayên hev in. Aydogan wiha dom kir: "Heke em birayên hev in, çima li her bajarekî Tirkiye û Kurdistanê bi hezaran dibistanên ku perwerdehiya bi zimanê tirkî tê dayîn hene û yek dibistaneke ku ji aliyê dewletê ve hatiye vekirin û bi zimanê kurdî perwerdehî tê dayîn tune ye? Çima di 21’ê Reşemî Roja Zimanê Zikmakî ya Cîhanê de li hemberî dibistanên ku gelê kurd bi derfetên xwe ava kirine ew qas êrîşên dijwar ên dewleta Tirkiyeyê pêk tên û deriyên dibistanan tê morkirin û hîn jî morkirî ne. Feraset û felsefeya Erdogan û hukumeta AKP’ê ya xwişk û biratiya bi gelê kurd re ev e."

Aydogan got ku ji bo mirovan şertê yekemîn ê azadiyê axaftin, xwendin, nivîsandin û perwerdehiya bi zimanê xwe ye û got: "Li hemberî siyaseta înkar û tunekirinê ya dewletê daxwaza perwerdehiya bi zimanê kurdî di destê gelê kurd de çeka herî serekeye. Em dikarin bêjin ku gelê kurd vê çeka xwe ya bi derb bikar bîne, dê mifteya azadiya zimanê xwe bidest bixe û ji bo zimanên gelên bindest bibe mînak, model û rêya azadiya zimanên gelan vebike. Li ser bingeha vê rastiyê, wekî Navenda Giştî ya Kurdî Derê, banga me ev e. Heta ku hemû maf û azadiyên ji bo hemwelatiyên tirk ji aliyê dewletê ve tên pêşkêşkirin, ji bo gelê kurd û gelên din ên li Tirkiyeyê dijîn jî bên dayîn û di Zagona Bingehîn de bên bicihkirin, divê siyasetmedar, parlementer, şaredar, rêveber, rayedar û hemû pêşengên siyaseta kurd li sûkê, li bazarê, li dibistanê, li nexweşxaneyê, li dadgehê, li kuçe û kolanê û li hemû qadên jiyanê, bi kurdî biaxivin, bixwînin, binivîsin, bifikirin û bi kurdî bijîn. Ya herî girîng jî, li hemû qadên jiyanê doz û daxwaza perwerdehiya bi zimanê zikmakî berz ye ku em vê daxwaze bilind bikin."

Piştî daxuyaniyê rêveber û endamên KURDÎ-DER'ê belavokên bikurdî li gel belav kirin.