Ertuş Berçelan

PDK ev demek dirêj e behsa serxwebûnê dike. Ez bawer im tu kurd jî li dijî vê daxwaza KDP’ê nîn in. Lê ev siyaseta PDK’ê di nav gel û rêxistinên kurd de coş û heyecanekê ava nake. Ev hefteyek e ez li başûrê Kurdistanê me. Li vir jî gel ji siyaseta PDK’ê ya serxwebûnê bi coş nîn e.

Dema mirov li sedema rewşa sarbûnê dinêre wekî asteng cardin polîtîkaya PDK’ê bixwe derdikeve pêşberî mirov. Gelo çima siyaseta PDK’ê ya serxwebûnê coşê nade gelê kurd?

Yek PDK behsa serxwebûnê dike lê bi YNK’ê re di nav şer  de ye.

PDK behsa serxwebûnê dike lê bi Goran re şer dike..

PDK behsa serxwebûnê  dike lê bi PKK’ê re şer dike.

PDK behsa serxwebûnê dike lê PYD’ê re şer dike.

PDK behsa serxwebûnê dike lê bi Komele, Yekgirtû û bilcumle rêxistinên kurd re şer dike.

PDK ligel ku ji sedî 5’ê kurdan temsil dike bi sedî 95’ê kurdan re di nav şer de ye.

PDK li gorî tu rêbazên demokrasiyê tevnagere. Li gorî qanûnên Herêma Federal a Kurdistanê, dema wezîfeya Birêz Barzanî qediya ye. Niha tenê sifata wî ya Serokê Giştî yê PDK’ê heye. Lê ligel vê yekê jî PDK û Birêz Barzanî destûr nadin ku makanîzmayên demokratik pêk bên û Serokê Herêma Kurdistanê bê hilbijartin. Dixwaze bi temsîliyeta xwe ya ji sedî 5 tevahiya gelê kurd bigire bin îktîdara xwe.

PDK bi vê jî namîne, li ser daxwaza dewleta tirk ambargoyê datîne ser Rojava. Bi polîtîkaya xwe bi awayek objektif tevli polîtîkaya dewleta tirk a fetisandina Şoreşa Rojava dibe. Cardin li hemberî hemû komkujiyên dewleta tirk bêdeng dimîne û heta gelek caran bi daxuyaniyên xwe piştgirî dide.

PDK heman polîtîkaya xwe ya yekperest û hegemonîk di warê konferansa neteweyî de jî nişan dide. Hasasiyet û polîtîkayên dewleta tirk li ber çavan digire û nêzîkê pêkanîna konferansê nabe. Heta bi awayek objektîf niha li pêşiya konferansê tekane asteng PDK ye.

Li aliyê din, di warê rêveberiya herêmê de jî xwedî sicîlek paqij nîn e. Tevahiya sazî heta qirika xwe ketine nav bertîl, dizî û rantê. Piştî qeyrana aborî dest pê kir, vê carê PDK’ê bi xwe neçar ma pêşiya dizî, rişwet û ranta di nav PDK’ê de heyî bigire. Komîsyonek hat avakirin lê li gorî agahiyan vê komîsyonê jî nekarî tiştekî bike.

PDK hem nêzîk siyasetek demokratik nabe, hem şefaf nîn e, hem jî helwestek têkildarî yekîtiya gelê kurd nîşan nade, li şûna piştgirî bide Rojava niha ambargo datîne û parçebûna di navbera kurdan de kûrtir dike.

Ji ber vê polîtîkayê ye, gotinên PDK’ê yên têkildarî serxwebûnê coşê nadin gelê kurd. Heta êdî wekî perdeyek polîtîkaya antî demokratik,  bertîl, qeyran, rant û  hevkariya bi dewleta tirk re vedişêre tê şîrovekirin.

Ger PDK samîmî be divê dest ji şerê bi rêxistinên kurd re berde, ambargoya li ser Rojava rake, komkujiyên Tirkiyeyê yên li Bakur şermezar bike û hevkariya bi Erdogan re bihêle, destûr bide hilbijartina Serokatiya Herêma Kurdistanê û ji bo kongreya neteweyî hewil bide.

Wê demê ez bawerim dê gelê kurd jî samîmiyeta PDK’ê bibîne û coş ji siyaseta wê bigire.

08.06.2016, Azadiya Welat