CÎHAN ROJ/ANHA/QAMIŞLO

“Hevdîtinên me bi berpirsyarên Amerîka li Koşka Spî çêbûn. Me vekirina Nûnertiya Rojava ya li Washingtonê pêşniyar kir, bersiva wan erênî bû. Em niha li ser karên rûtîn kar dikin. Nûnerî di demeke nêzîk de wê bê vekirin.”

Ev gotinên Nûnera Rêveberiya Xweseriya Demokratîk a Derve Sînem Mihemed in. Ew li ser nûneriyên nû yên  Rêveberiya Xweser li Amerîka û Hollandayê axivî.

Hevdîtinên li Almanyayê

Mihemmed guherîn û veguherîna dewletên Ewropayê ligel Rêveberiya Xweser bi mînaka Almanya wiha rave kir:  “Hin dewlet di destpêkê de ji hevdîtin û têkiliya bi me re bê niyet bûn. Nexasim Almanya tişta gelê Rojava dijiya qebûl nedikir. Qebûl nedikir têkiliyan bi Rojava re deyne, bê guman sedema vê yekê ji ber têkiliya wan a baş bi Tirkiyê re bû. Dewleta Tirk ji wan xwest ku me pêşwazî neke. Li Almanya em bi perlementerên ji Partiyên Çep û saziyên civakî yên sivîl re hevdîtinan dikin. Lê di nava çend mehên dawî de, civîna me bi Seroka Partiya CDU ku li ser desthiladariya Almanyaye re çêbû. Di heman demê de hevdîtina me bi partiya SPD ya Almanî re ku cihê xwe di rêveberiyê de digire re çêbû. Piştî van hevdîtinan me bi Berpirsê Wezîrê Karên Derve yê Almaniya hevdîtin çêkir. Her wiha Vekirina Nûnertiya Rojava li Almanya wê yekê nîşan dide. “ 

Li Washingtonê jî em ê vekin

Mihemmed da zanîn ku wê di demên pêş de nûneriyên xwe li Amerîka û Holanda jî vebikin û vê rewşê wiha nirxand: “Hevdîtinên me bi berpirsên Wezareta Derve ya Amerîka re çêbû, her wiha hevdîtinên me bi berpirsyarên Amerîka li Koşka Spî jî çêbûn. Di hevdîtinan de me vekirina Nûneriya Rojava ya li Washingtonê pêşniyar kir, bersiva wan erênî bû. Em niha li ser karên rûtîn kar dikin. Nûnerî di demeke nêzîk de wê bê vekirin. Di mijara şerê terorê û rewşa mirovî û siyasî li Sûriyê jî hevdîtinên me bi rayedarên di Wezareta Derve ya Amerîka re çêbûye. Ji bo vekirina nûneriya me li Holanda jî me hevdîtin bi berpirsyarên wir re çêbûne. Me xebatên rûtîn ji qedandine da ku em nûneriyê vebikin.”

Rûreşiya PDK’ê 

Sînem Mihemmed çend roj berê xwestibû ji ser Deriyê Sêmelka re derbasî başûrê Kurdistanê bibe û piştre jî bi heyetek tevlî Foruma Civaka Cîhanê ya li Kanadayê bibe. Lê ji alî rayederên PDK’ê ve derbasbûna wê jî hat astengkirin û ji ber vê yekê tevlî Forumê nebû. Mihemmed ev yek wisa nirxand: "Foruma Civaka Cîhanê (World Social Forum) a li Kanadayê îsal di dema di navbera 9 û 16’ê gelawêjê de wê bê lidarxistin. Komîteya Amadekar a bi awayekî fermî Rojava vexwend Forumê. Lê ji ber dorpêça li ser Rojava ku ji aliyê PDK’ê ve hatiye kirin, şandeya me nikarîbû di Deriyê Sêmalka re derbas bibe û beşdarî Forumê bibe.

Me dê rola jinên Rojava di aliyên siyasî, civakî, leşkerî û bi taybet jinên di nava YPJ’ê de li Forumê nîqaş bikira. Di heman demê de wê Konfederaliya Demoratîk a Rojava bihata nîqaşkirin. Lê mixabin ji ber ku sînor ji aliyê PDK’ê ve girtiye, şandeya me nikarî beşdarî forumê bibe."