Diyarname

Tîmê îngilîz, tîmê karkeranên bênderan Liverpool hemberê tîmo bîn ê îngilîz Totenhamî de bi ser kewt û kûpa berde kê xo.

Liverpoolî hema destpakerdişê maçe, saniyey 50'î de penalkî girot e. Kaykerdoxê Liverpoolî Salah bi penaltî gole eyşte, hem tîmê xo 1-0 raver berd, hem di dîrokey Lîgê Şampiyonan de hetê "gola leze hamiya eştiş" de rekor şikit.

Di nimey joyîn û nîmey diyin ê maçe de ataqê Tottenhamî feyde nêday û di deqey 88 de Divock Origi serê namey tîmê xo de gole eyşte û va kûpa ê ma wa. Kaykerdoxê teknîk dîrektor Kloppî hesretê yê kûpay Lîgê Şampiyonan ard ca. Kloppî bi tîmanê xo hem di Lîgey Ewropay a UEFA de hem di fînalê Lîgê Şampiyonan de kerd bî vinî û heta enka kûpa nêgirote bî, eyro girote.

Di miyanê tîmanê Îngilistanî de tewr zehf Liverpoolî ene kûpa girota û bi kûpay eyroyîn ra bî tîmo hîriyîn ke tewr zehf kûpa girota.

Tewr zehf Real Madrîdî girota

Heta enka tewr zehf Real Madrîdî ene kûpa girota, tam 13 rey. Dima yê Milan bi 7, Liverpool bi 6, Bayern û Barselona jî bi 5 reyan di rêze de yê. Ajaks 4, İnter, M. Unitad 3, Juventus, Benfica, Forest 2, 

Celtic, Dortmund, Hamburg, Marseilles, Chelsea, Feyenoord, PSV, Aston Villa, RS Belgrade û Steaua Bucuresti jî her joy rey ke ene kûpa berda kê xo.

Goleyştox Messi

Bi ene maçe serdemê Lîgê Şampiyonan ê 2018-2019 temam bî. Di enî serdemî de tewr zehf kaykerdoxê BArselona Messi golî eyştî. Messi emsar tam 12 golî eyştî û payey kaykerdoxê tewr zehf golî eyştê girot. Messi di temamê jiyaney xo a di Lîgê Şampiyonan de 112 golî eyştê.

Reqîbê Super Kupa jî eşkera bî

Emsar tîmê îngilîz Chelsea kûpay Lîgê Ewropa a UEFA girote, Liverpool jî Kûya Lîgê Şampiyonan. Enî wirdî tîmî qeybî Super Kûpa a UEFA go bêrê têhet. Maçey wirdînan di Vodafone Park a Beşîktaşa Tirkiya de bêro kaykerdiş.