Diyarname

Çepgir, nivîskar, senarîst, helbestvan, romanivîskar, bi kurtahî rewşenbîr Vedat Turkalî îro xatir xwest û çû.

Turkalî di 13'yê gulana 1919'an de li Samsunê hatiye dinê, heta lîseyê li wir dixwîne û di sala 1942'yan de jî ji Zanîngeha Stenbolê Beşa Wêje û Zimanê Tirkî xwendina xwe temam dike. Piştî ku di Lîseya Leşkerî ya Kûlelî û Lîseya Leşkerî ya Maltepeyê de mamostetiya wêjeyê dike, di sala 1951'ê de ji ber çalakiyên wî yên siyasî 9 sal cezayê heqsê dixwe. Piştî 7 salên girtîgehê bi şert tê berdan. Ew ligel Rifat Ilgaz "Weşanxaneya Gar" vedike, di sala 1960'î de jî senaryoya "Dolandiricilar Şahi" (Şahê Şêlankeran) dinivîse û dûre vî karê xwe yê senaryoyê didomîne. Sala 1965'an de derhênerî jî direcibîne lê paşê dest ji vî alî ber dide.

Romana wî ya yekem bi navê "Bîr Gun Tek Başina" di sala 1974'an de tê weşandin û paşê romanên din tên.

Romana wî ya ku herî zêde tê zanîn "Guven" e ku li ser serdema têkoşîna wan a di Partiya Komunîst de ye. Wî romana xwe ya dawî "Bîttî Bîttî Bîtmedî" jî li ser kurdan saz kiribû. 
Turkalî wekî dostekî kurdan her tev digeriya. Wî ji bo azadî, demokrasiyê îmze avêt bin gelek danezanan, her ligel rewşenbîrên demokrat, çepgir ên tirk û kurdan bû. Wî ji bo Rêberê PKK'ê Abdullah Ocan digot "Birayê min Ocalan" û di bernameya televîzyonê NTV, weşana zindî de silav ji bo Ocalan şandibû. Ji bo wekhevî û azadiya kurdan û tirkan jî gelek tişt gotiye.

Wî di nav TKP'ê (Partiya Komunîst a Tirkiyeyê) ya berê de cih girtibû. Di sala 2002'yan de ji lîsteya DEHAP'ê bû berendamê mebûsiyê lê partî bendav derbas nekir.

Turkalî bi berhemên xwe glek xelat j3i girtine. Di sala 1965'an de bi senaryoya fîlmê "Karanlikta Uyuyanlar" (Yên di tariyê de radizên) li FesTîvala Porteqala Zêrîn a Antalyayê Xelata Senaryoya Herî Serketî girt. Di sala 1970'ê de ji TRT'ê Xelata Lîstikan, sala 1974'an de di Pêşbaziya Romanan de xelata yekemînî, sala 1976'an de Xelata Diyariya Romanê ya Orhan Kemal û îsal (2016) jî Xelata Rûmetê ya Wêjeyê ya Beyaz Marti girt. Her wiha Siyadê (Komeleya Rexnegirên Sînemayê) di sala 2010'an de Xelata Rûmetê dabî Turkalî.

Turkalî ku ev demek bû dihat dermankirin îro li Yalovaya Tirkiyeyê wefat kir.

Berhemên Turkalî ev in:

- Bîr Gun Tek Başina (roman, 1974)

- Eskî Şîîrler, Yenî Turkuler (helbest, 1979)

- Uç Fîlm Bîrden (senaryo, 1979)

- Mavi Karanlik (roman,, 1983)

- Eskî Fîlmler (senaryo, 1984)

- Bu Gemî Nereye (gotar, bîranîn, 1985)

- Dallar Yeşîl Olmali (lîstik, 1985)

- Tek Kîşîlîk Olum (roman, 1989)

- Ozgurluk Îçîn Kurt Yazilari (Ji bo azadiyê nivîsên li ser kurdan) (gotar, 1996)

- Guven (roman, 1999)

- Komunîst (bîranîn, 2001)

- Yeşîlçam Dedîklerî Turkiye (roman, 2001)

- Bu Olu Kalkacak (lîstik, 2002)

- Dallar Yeşîl Olmali (lîstik, 2002)

- Kayip Romanlar (roman, 2004)

- Yalanci Taniklar Kahvesi (roman, 2009)

- Bîttî Bîttî Bîtmedî (roman, 2014)