Akademiya Civaka Demokratîk

Duh li sandîkaya karkeran a bajaroka Rimêlanê Saziya Zanist û Ramana Azad 2’yemîn konferansa li dar xist. Di konfransê de 200 nûner ji her sê Kantonên Rojava, her wiha mêvan ji Tevgera Civaka Demokratik (TEV-DEM), Rêveberiya Xweser, Kongra Star û Saziyên Civaka Sivîl, amade bûn. Di konferansê de navê saziyê guhartin û kirin "Akademiya Civaka Demokratîk". Li gor biryaran sazî dê xebata xwe ya li ser perwerdehiyê bidomîne, her wiha her sêmehan li ser kar û xebatên xwe kovarek biweşîne.

Altinors hat girtin

Zordariyên li ser HDP'ê her ku diçe zêde dibin. Cîgerê Hevserokên Giştî yê HDP'ê Alp Altinors ku ev çend roj bûn di bin çavan de bû bi şev hat tewqîfkirin. Hevserokê HDP'ê Selahattin Demîrtaş li ser girtina wî twitteke weşand û got: "Alp Altinors şoreşgerekî ser bilind û bi rûmet e. Ne namerd, diz û kujerê gel e, ew rûmeta me ye."

Çi hat ser vê tabelayê çi nehat?

Piştî ku Hikumetê bi "kayyûmê" dest danî ser şaredariyên DBP'ê yên kurdan, qeymeqamên dewletê ku wekî kayyûman hatine tayînkirin pêşî dest avêtin tabelayên şaredariyan ên bi pirzimanî. Li Giyadînê tabelaya bi kurdî û tirkî daxistin li ser nerazîbûnan dîsa daliqandin. Paşê tabelaya Şaredariya Dêrikê daxistin ku bi kurdî, tirkî û ermenkî bû. Tabela bi rengên kesk, sor û zer hatibû çêkirin. Qeymeqamê hatî ew daxist, li ser nerazîbûnan vê carê tenê bi kurdî û tirkî daliqand, dîsa nerazîbûn çêbûn, ew tabela jî daxist û dîsa bi sê zimanan daliqand. Rewş vegeriya dema pêşî lê rengên kesk, sor û zer çûn, spî û sor hat...