Îskan Şîvhelan

Kongreya Neteweyî ya Kurdistanê (KNK) ev demek e li başûr û rojavayê Kurdistanê xebatên yekîtiya neteweyî dimeşîne. Ne tenê li van her du parçeyan, bi tevahiya sazî û dezgehên Rojhilat û Bakur re jî civiya. KNK’ê duh bi daxuyaniyekê encama van hevdîtinên xwe eşkere kir. Li gorî daxuyaniyê di çarçoveya kongreya neteweyî de, dê di 15’ê tîrmehê de bi beşdariya 300 delegeyan Platforma Yekîtiya Neteweyî bê lidarxistin. Van çend salên dawiyê li Kurdistanê gelek pêşketin çêbûn. Girêdayî van gelek destkeftiyên gelê kurd derketin holê. Her yek ji van destkeftiyan gelekî nirxbuha ne. Lê pêşketina herî girîng Platforma Yekîtiya Neteweyî ye. Çima? Berî niha jî me gelek caran ev mijar bi bîr xist. Wekî dubare be jî, ji ber girîngiya wê ez dixwazim careke din dubare bikim. Şerê Cîhanê yê 3’yemîn li Rojhilata Navîn bi hemû germahiya xwe didome. Di dawiya vî şerî de nexşeya Rojhilata Navîn dê ji nû ve bê xêzkirin. Pêşketinên di nav çend salên pêşiya me de, dê çarenûsa kurdan a bi sedan salan diyar bike. Sed sal berî niha heman tişt hat serê kurdan.

Niha dîsa firseteke nû derketiye. Li gorî sed sal berî niha kurd di gelek waran de xwedî derfet in. Di warê civakî, çandî, leşkerî û dîplomasiyê de merheleyên gelek mezin derbas kirin. Di aliyê navneteweyî de jî yekem car e ku pêşiya gelê kurd ew qas vekirî ye. Dewletên dagirker, nikarin wekî berê piştgiriyê ji hêzên hegemonîk bigirin. Berovajî vê li gorî şert û mercên heyî car û baran piştgiriya gelê kurd dikin. Bi kurtasî derfetên azadiya kurd û Kurdistanê heta dawiyê çêbûne. Ku kurd bixwazin dikarin azadiya xwe pir bi hêsanî bi dest bixin. Lê tenê şertekî vê heye. Ew jî ‘Yekitiya Neteweyî’ ye. Niha li gel ew qas derfetan rewşa herî zêde kurdan qels dike û firsetê dide dijminên kurdan, tunebûna yekîtiya neteweyî ye. Tunebûna yekîtiyê niha wekî xencerekê li ser serê gelê kurd diheje. Siyaseta kurd bikare di vê demê de yekîtiya xwe ava bike, dê bikare statuya ji bo Kurdistanê dixwaze, bi dest bixe.

Dibe gelê kurd niha xwedî artêşeke mezin be, di şer û cengan de destkeftiyên mezin bi dest bixe, di qada navneteweyî de pêşiya wî vekirî be, lê heta yekîtiyê pêk neyne, yek ji van mîsoger nîn in. Mîsogeriya van destkeftiyan tevan yekîtiya neteweyî ye. Ji bo wê di nav çend salên dawiyê de gava herî girîng pêkanîna Platforma Yekîtiya Neteweyî ye. Ji bo vê xebatên KNK’ê yên di vî warî de, bi qasî serkeftinên li eniyan girîng e. Daxwaza gelê kurd jî pêkanîna yekîtiyê ye. Ji bo vê divê hemû siyaset, kom û kesayetên kurd piştgiriyê bidin vê gava pîroz. Divê her kes bêyî ferqê bixe navberê, xwedî li vê pêvajoyê derkeve. Ji ber ku yekîtiya neteweyî ne pêwîstî, mecbûriyet e. Em vê mecbûriyê bi cih neynin, dê firsetên dîrokî ji destê me birevin.
05.07.2017, Rojeva Medya