Diyarname
FARC'ê piştî berdana çekan dest bi avakirina partiya siyasî kir û her wiha lîsteya mal û milkê xwe pêşkêşî Neteweyên Yekbûyî (NY) kir. Li gor lîsteyê 320 mîlyon dolar hebûna FARC'ê heye.

Hêzên Çekdar ên Şoreşger ên Kolombiyayê (FARC) û dewleta Kolombiyayê par li hev kiribû. FARC dê çek berdana û wekî partiyek siyasî kar bikira. Bi vê yekê re FARC'ê dem bi dem çekên xwe teslîmê NY'ê kirin. Vê carê jî FARC'ê bi rêya yek ji rêveberên xwe Pastos Alape û
nûnerê xwe yê fermî Rafael Malagon li paytexta Kolombiya Bogota lîsteya mal û milkên FARC'ê pêşkêşî NY'ê kir.

Serdozgerê Kolombiya Nestor Humberto Martinez gotiye ku wan lîste dîtiye, 135 rûpel e û ne hêjayî nirxandinê ye. Alape li ser vê yekê got ku Serdozger Martinez dixwaze aştiyê xira bike.
Li gor lîsteya ku dane NY'ê bi buhaya 150 mîlyon dolarên amerîkî malên FARC'ê, her wiha 320 kîlo jî zêr hene. FARC'ê di lîsteyê de amûrên kîlerê wekî "fincanên qehweyê", "makîneya guvaştina mêweyan" jî li lîsteyê kiribû û ji ber vê yekê rastî rexneyên wekî "FARC bi tiştên wisa henekên xwe bi qurbaniyên pevçûnê dike" hatibû.

FARC kongreyê saz dike
Her wiha DW beşa tirkî jî nûçeyek weşand û got ku FARC kongreyek çêdike ku heta 1'ê rezberê dê ev kongre bidome û di kongreyê de dê biryara sazkirina partiya siyasî bide.
Li gor nûçeyê yek ji serleşkerên gerîla yê berê Ivan Marquez ji bo AFP'ê axiviye û gotiye, "Ew difikirin navê Hêza Şoreşger a Alternatîf a Kolombiyayê bikar bînin."
Di kongreyê de li dor hezar delegeyî dê cih bigirin, ew dê berendamên xwe yên ji bo mebûsiyê diyar bikin.