Diyarname
Vê êvarê 5'emîn Festîvala Fîlman a Duhokê bi merasimek ku li Salona Kongreyê ya Zanîngeha Duhokê li dar ket dest pê kir. Di merasimê de gelek lîstikvan, derhêner û mêvanên din amade bûn.
Piştî axaftinan fîlmê derhêner Kazim Oz "Zer" wekî fîlmê destpêkê yê festîvalê hat nîşandayîn. Di festîvala ku heta 16'ê mehê dê bidome de ji 50 welatan li dor 130 fîlm, kurtefîlm û belgefîlm dê bên nîşandayîn.

Fîlmên derhênerên kurd ên metrajdirêj
Di nav festîvalê de gelek beş hene. Di beşa filmên metrajdirêj de ji 3 parçeyên Kurdistanê 7 film cihê xwe digirin. Film bi pirranî ji berhemên kurdên li diyasporayê pêk tê. Ji rojhilatê Kurdistanê Jamil Mafakhery (Cemîl Mexaferî) bi filmê “Had Been Pomegranted for You/Ji bo te ez hinar bûm”, ji başûrê Kurdistanê Fikrî Beroşî bi filma “A Dream Before Dying/Beriya mirinê xewnek” jî di nava van heft filman de cihê xwe digirin. Filmê Amed Korkmaz ê bi navê “Leyla”, filmê  Ali Kemal Çinar  “Genco” û filmê Haşim Aydemir ê li ser hovîtiya li Zindana Amedê "14´ê Tîrmehê" jî derdikevin pêşberî temaşevanan.

Hin kurtefîlm
Di beşa kurtefilmên kurdî de 8 film hene. Mihemed Şerwanî bi “Dia", Mehmet Ali Baran bi “Node”  di beşa kurtefîlman de dê bikevin dû xelatê. Her wiha Kardo Mansûr bi "Tehma Kîvroşkê", Mistefa Gandomkar bi "Alan" jî di vê beşê de ne.

Hin belgefîlmên di pêşbaziyê de
Di beşa belgefilmên kurdî de jî 5 belgefîlm hene. Ji van derhêner Rêber Doskî ê bi belgefîlmê xwe "Radyoya Kobanî", Hakar Abdulqader bi "Jihevqutbûn", Taylan Mîntaş bi "Birayên Bêdengiyê", Asil Ozarslan bi "Dil Leyla", Apo W. Bazîdî bi "Berxwedan Jiyan e" û Ersîn Kana jî bi "Keskesor" di beşa pêşbaziya belgefîlman de dê bêne nîşandayîn.

Fîlmên Pêşbaziya Metrajdirêjan
Her wida di beşa Pêşbaziya Fîlmên Metrojdirê de jî ev 7 fîlm hene:
- Cemîl Mefaxerî, I Had Been Pomegranted For You (Ji bo te ez hinarek bûm) - Îran/ 2017/ 80 deqîqe
- Fikrî Beroşî, A Dream Before Dying (Beriya mirinê xewnek) – Başûrê Kurdistanê / 2017/ 100 deqîqe
- Bulent Ozturk, Blue Silence (Bêdengiya Şîn) - Belçîka, Tirkiye/ 2017/ 93 deqîqe
- Rojda Şekersoz, Beyond Dreams (Ji Xewnan û Wêde) - Swêd/ 2017/ 90 deqîqe
- Ali Kemal Çinar, Genco - Tirkiye/ 2017/ 80 deqîqe
- Haşim Aydemir, 14 July (14 Tîrmeh) - Tirkiye/ 2017/ 148 deqîqe
- Amed Korkmaz, Leyla - Tirkiye/ 2017/ 60 deqîqe