SILÊMANÎ/ ROJNEWS
Îro êvarê Komîsyona Hevbeş a YNK û Tevgera Goran li navenda Goran a bajarê Silêmaniyê civiya. Piştî civînê endamê Komisyona Hevbeş a YNK û Goran Îmad Ehmed daxuyaniyek da çapemeniyê.
Îmad Ehmed diyar kir ku wekî Komîsyona Hevbeş a YNK û Goran civîna xwe ya hevbeş lidar xistin û wekî du aliyên siyasî li ser karesata hatiye serê herêmê bicivin û rêyek çareseriyê jê re peyda bikin.
Îmad Ehmed wiha got; “Civîna îro bi taybetî li ser rewşa herêmê û encamên derketine bû. Her wiha çawan çareserî peyda bikin bû. Emê demek ji hefteyekê kêmtir cardin bicivin.”
Li ser projeya ‘Hikumeta Rizgariya Niştîmanî’ ya Tevgera Goran pêşkêş kiriye jî, Îmad Ehmed got; “Demek nêz wê bibe projeya me hemûyan.”
Şanda Goran ji Rêberê Giştî yê Tevgera Goran Omer Seyîd Elî, endamê Xaneya Raperandin (Desteya Rêveberiyê) Heme Tûfîq Rehîm, endamê Civata Niştîmanî ya Goran Îsmaîl Namîq pêk dihat.
Şanda YNK’ê jî ji endamên Polîtburoya YNK’ê Hêro Îbrahîm Ehmed, Qadir Hemecan, Refet Ebdullah, Îmad Ehmed û endama Rêveberiya YNK’ê Şalaw Kosret Resûl pêk dihat.