Diyarname

Desteya Ahengîsaz a TZPKurdî roja 28’ê adara 2010’an civîna xwe ya asayî pêk anî. Desteyê ji bo roja ziman li Amedê biryara resepsiyonekê û biryara li darxistina 3 mîtîngan da.

Desteya Ahengîsaz a TZP kurdî di civîna xwe de li ser rewşa giştî ya siyasî, rewşa xebatên zimên bi berfirehî nirxandin kir û ji bo dema pêşiya xwe jî bernameya xwe ya xebatê amade kir.

Piştî civînê desteyê di daxuyaniya nivîskî ku weşand de girtina rojnameya Azadiya Welat bi tundî şermezar kir û piştevaniya xwe ji bo tekane rojnameya xwerû bi kurdî Azadiya Welat diyar kir. Desteya Ahengîsaz biryar girt ku bi vê armancê kampanyayekê bide destpêkirin. Her wiha desteyê êrîşa li ser saziyên kurd ên li Brukselê jî şermezar kir.

Girîngiya TZPKurdî nehatiye fêmkirin

Daxuyanî dide zanîn ku di van çend salan de TZPKurdî bi têkoşîn û xebatên xwe bingeheke rêxistinî û hişmendiyê ya zimanê kurdî ava kiriye, her wiha xebatên hîndekariyê bingeha perwerdehiya kurdî jî hêdî hêdî kiriye. Di daxuyaniyê de wisa hate gotin: "Xebatên TZPKurdî her çiqas heta radeyekê di nava civakê de bi cih bûbin jî, ew xebat nikarin bandoreke baş li civakê bikin. Piraniya kurdan hê ji xebateke wiha ne agahdar in, kesên ku agahdar in jî bi tenê ji hin çalakiyên wê agahdar in, bi girîngiya wê û têkoşîna zimên nehesiyane. Her wiha di nava qada siyasî de jî cih û girîngiya TZPKurdî nehatiye fêmkirin û pejirandin."

3 hezar kes beşdarî qursan dibin

Daxuyanî dibêje ku TZPKurdî bi xebatên xwe yên hîndekariyê hêdî hêdî bala civakê dikişîne ser xwe, lê xebatên hişmendiyê hê jî pir qels in û van yekan lê zêde dike: "Çalakiyên hişmendiyê ne li gorî bernameyeke birêkûpêk, bi piranî di hin rojên taybet de têne kirin. Di warê rêxistinî de her çiqas ne li gorî daxwazê be jî xebat her ku diçe berfireh dibe, bi vê armancê li gelek cihan komîsyon û komele hatine vekirin. Di warê hişmendiyê de jî hê tam xebateke birêkûpêk û li gorî bernameyekê pêk nehatibe jî nemaze di rojên taybet de gelek çalakî hatine lidarxistin. Xebata perwerdehiyê ji aliyê çawanî û çendaniyê her ku diçe bi pêş dikeve. Li gorî raporên ku herêman li seranserî Kurdistan û Tirkiyeyê niha zêdetirî 3 hezar kesî beşdarî kursên TZPKurdî dibin, hejmareke nêzî vê jî kurs bi dawî kirine û sertîfîka wergirtine."

Resepsiyonek û 3 mîtîng

Desteya Ahengîsaz di civîna xwe de li ser Cejna Zimanê Kurdî jî hin biryar girt. Li gor van biryaran wê roja 14'ê gulanê li Amedê resepsiyoneke bê dayîn, roja 15'ê gulanê li Kop û Cizîrê, roja 16'ê gulanê jî li Qoserê wê mîtîngeke ziman li dar bixe.

Her wiha hate gotin ku malpera TZPKurdî jî hatiye nûkirin û dê xebatên wan di vê malperê de bi berfirehî bêne weşandin.