AMED
Hunermendê navdar ê ermenî Aram Tîgran, di 1'emîn salvegera xwe de ji aliyê 100 hezaran kesî ve hat bibîranîn. Di konsera ji bo bîranînê de hemû hunermendên derketin ser dikê, stranên Tîgran strîn.

Hunermendê navdar Aram Tîgran ê ermenî li Amedê bi konserek ku zêdeyî 100 hezar kesan beşdar bûn hat bibîranîn. Ji bo 1'emîn salvegera dilovaniya Aram Tîgran bi dirûşmeya "Bilbilê dilê gelan, evindarê rojê digerin, li Mezopotamyayê tu bûyî denge gelan, rêhevalê rojê" li Qada Batikentê konserek awarte hate lidarxistin. Bi hezaran kesên ku bi munasebeta Kongreya Asayî ya KCD'ê ji Mêrdîn, Şirnex, Êlih, Sêrt û bajarên derdorê hatibûn Amedê bi heman coşê beşdarî konserê bûn. Girseya ku piştî kongreyê ji Rêxistina BDP'ê bi meşek girseyî heta Qada Batikentê meşiyan beşdarî konsera bibîranînê bûn. Girseyê di meşê de dirûşmeyên "Bijî Serok Apo", "PKK gel e, gel li vir e" "Tolhildan" û "Em dê cîhana bêyî Ocalan bi ser we de hilweşînin berz kirin.

Encamnameya KCD'ê bi fîşekên hewayî hate xwendin

Piştî girse gihişt qada konserê Hevserokên KCD'ê Ahmet Turk û Aysel Tugluk her wiha parlementerên BDP'ê derketin ser dikê û girse slav kirin. Girsê jî bi yek dengî bi dirûşmeya "Kurdistan bi we rûmetdar e" bersivand. Hevseroka KCD'ê Aysel Tugluk encamnameya kongreyê xwend. Bi deh hezaran kesan bêdeng li encamnameyê guhdar kir. Piştî encamname hate xwendin bi srûda "Hernepêş" re fîşekê hewayî hatin avêtin û "Xweseriya Demokratîk" hate pîrozkirin. Di platformê de posterê Aram Tîgran û pankarta "Bilbilê dilê gelan, evîndarê rojê digerin, li Mezopotamyayê tu buyî dengê gelan, rêhevalê rojê" û "Xweseriya Demokratîk pîroz be" hate vekirin. Her wiha dîsa posterên siyasetmedarên kurd Cîhan Denîz û Huseyîn Ablay hatin daliqandin. Li qada mîtîngê jî pankarta mezin a "Em îlankirina Xweseriya Kurdistanê slav dikin" û ala KCK'ê hate daliqandin. Girseyê li qada konserê posterên Rêberê PKK'ê Abdullah Ocalan û rengên kesk, sor û zer rakirin.

Hunermendan ji bo Aram Tîgran stran

Pişt re hunermendên Navenda Çand û Hunerê ya Dîcle Firatê derketin ser dikê û stranên Aram Tîgran strîn. Pişt re Koma Sorxwin a Zarokên Cizîrê derketin ser dikê û bi coşek mezin hatin pêşwazîkirin.
Konser bi stranên Serhedo, Rojbîn, Xemgîn Bîrhat, Mehmet Atli, Koma Gulê Xerzan, Çetin Oraner, Seyda Perînçek, bi dawî bû.

DÎHA