Amed
Şaredariya Çinarê navê Cemal Çam ê ku tevî 9 girtiyên din li girtîgeha Amedê hat kuştin li salona konferansê ya şaredariyê kir.

Di 24'ê rezbera 1996'an de li girtîgeha Amedê leşker û gardiyanan êrîşê girtin kir û 10 kesî di wê êrîşê de jiyana xwe ji dest da. Yek ji wan kesan jî Cemal Çam bû. Niha Meclisa Şaredariya Çinarê biryar girt ku navê Cemal Çam li Salona Konferansê ya Şaredariyê bike. Ev biryar bi merasimekê anîn cih.
Şaredarê Çinarê Ahmet Cengîz, birayê Çam Yusuf Çam û bi sedan kes beşdarî merasima vekirina salona konferansê bûn. Piştî vekirinê ji bo 10 kesên di qetlîamê de jiyana xwe ji dest dan merasîma bîranînê hat li darxistin.
Di merasîmê de sînevîzyonek der barê jiyana Çam de hat nîşandayîn. Serokê Şaxa Tum Bel Sena Amedê Edîp Yaşar ku di merasimê de axivî, diyar kir ku hovîtiya di Girtîgeha Tîpa E ya Amedê de hatiye jiyîn berdewama hovîtiya salên 1980'yan e û wiha got: "Kemal, Hayrî, Mazlûm ji bo rûmeta mirovahiyê nedin eciqandin û ji hovîtiya tê jiyîn re bêjin bes, kevneşopiya berxwedanê dane destpêkirin. Tiştên di 24'ê rezbera 1996'an de li girtîgeha Amedê hatin jiyîn hovîtiyek e. Di encama êrîşan de 10 hevalên me jiyana xwe ji dest dan. 23 jî birîndar bûn. Lazim e ev welat bi paşeroja xwe re hev rû bibe. Ez hemû bûyerên hovane yên hatin jiyîn şermezar dikim û şehîdên me bi rêz bibîr tînim."

Şaredarê Çinarê Ahmet Cengîz jî, diyar kir ku ev bûyer di dîrokê de şopeke tarî ye û da zanîn ku gelê kurd bi têkoşînên mezin re gihîştine îro.