RIHA
Di "Şahiya hevnasînê" ya Komeleya Xwendekarên Zanîngeha Heranê (HODER) de, xwendekaran balkişandin ser girîngiya perwerdehiya bi zimanê zikmakî û xwestin di zanîngehê de beşên kurdî vebin.

Komeleya Xwendekarên Zanîngeha Herranê (HODER), ji bo destpêka hîndekariya sala 2010-2011'an, "Şahiya hevnasiyê" li dar xist. Di şahiya li salona Navenda Çand û Hunerê ya Rihayê (UKSM) hate li darxistin de, zêdetirî hezar xwendekarî amade bû. Di şahiyê de xwendekaran diruşmeyên, "Pêkutî me bêzar nakin", "Perwerdehiya bi zimanê dayikê maf e, em dê mafê xwe bistînin", "Bê zimanê zikmakî jiyan nabe" berzkirin. Şahî bi rêzgirtinê dest pê kir. Şahî diyarî xwendekarên li Amed û Muglayê li nava kolanan hatin kuştin Aydin Erdem û Şerzan Kurt hate kirin.
Di şahiyê de xwendekaran balkişandin ser girîngiya perwerdehiya bi zimanê dayikê û xwestin qedexeyên ji ser ziman rabin. Xwendekaran, daxwaza xwe ya vekirina beşa kurdî anîn ziman. Xwendekaran, bi gotina "Êdî em dixwazin ziman û wêjeya xwe hîn bibin. Em dixwazin bi kurdî hînê fîzîk, kîmya û matematîkê bibin" daxwazên xwe anîn ziman.

Di axaftinên hatin kirin de, pêkutiyên rektorê Zanîngeha Herranê li ser xwendekaran pêk tîne hatin nirxandin û şermezarkirin. Xwendekaran, dan zanîn ku rayedarên zanîngehê hewl didin xwendekarên ku nafikirin û nikarin pirsgirêkan çareser bikin pêş bixin.
Piştî axaftinên hatin kirin, helbestên bi kurdî û tirkî hatin xwendin. Koma şanoyê ya UKSM'ê bi lîstika bi navê, "Bimre axatî" derket ser dikê. Di şahiyê de li ber staranên komên muzîkê yên UKSM'ê Koma Zarokên Hêvî û Koma Hêvî govend hate gerandin. Şahiyê heta derengê şevê berdewam kir.

Ji DÎHA'yê hatiye girtin