Cemil Oguz

29'emîn Fûara Pirtûkan a Stenbolê TUYAP ku 30'ê meha borî dest pê kiribû 7'ê sermawezê bi dawî bû. Di fûara ku 550 weşanxane û saziyên sivîl beşdar bûbûn de nêzî deh weşanxaneyên kurd jî têde stand vekiribûn.
Yek ji xebatên girîng a fûarê ji bo kurdan li darxistina du panelên ji aliyê Weşanên Avestayê ve bû. Yek jê bi beşdariya Prof. Abbas Welî ku ew ji kurdên Mehabadê ye û ya din jî bi beşdariya Sechu Sende bû ku wî qala zimanê xwe galisî û kurdî kir.
Di fûarê de piraniya weşanxaneyên kurd ji fûarê kêfxweş bûn; ji ber ku hem pirtûkên xwe baş firotin û hem jî reklama xwe kirin. Hin ji weşanxaneyên kurd jî ne kar kirin, ne jî zerar, lê ew jî li ser wê fikrê bûn ku ji bo reklama pirtûkên kurdî beşdariya wan girîng bû. Her wiha edîtor û xwediyên weşanxaneyan ji bo me qala pirtûkên ku di standa xwe de herî zêde firotine jî kirin.
Vaye yek bi yek dîtina weşanxaneyên kurd:

Xwediyê Weşanên Avestayê Abdullah Keskin:
- Fûar ji bo me baş derbas bû. Ji par sedî 50'î baştir bû. Sedî 50 me zêdetir cîro kir.
Di nav pirtûkên me de herî zêde seta pirtûkên Cegerxwîn hat firotin. Balkêş bû, par tiştek wisa nebû lê îsal ji bo seta Cegerxwîn gelek eleqe hebû. Dîsa Şerefname jî gelek jê çû. Pirtûka "Di xewnan de jî ezê zimanê xwe winda nekim" jî li gor em li bendê bûn baş çû. Bi giştî em ji fûarê kêfxweş veqetiyan.

Xwediyê Weşanên Perî Ahmet Onal:
- Ji bo me ne xirab bû. Me mesrefê xwe derxist. Reklamê ku me kir jî ji bo me kar ma. Yê min, ez ji roja yekem ve her li standê bûm, min zêdetir bi xwendevanan re da û stand. Ew baş bû.
Di beşa kurdî de zêdetir pirtûka "Serhildana Seyîdan û Berazan" a Ahmet Aras me firot. Her wiha pirtûkên li ser Serhildana Agirî û Geliyê Zîlanê jî me zêde firotin.

Xwediyê Weşanên Nûbiharê Suleyman Çevik:
- Îsal ji par baştir bû. Kitêbên me yên nû hebûn, tesîra vê jî hebû. Me 20 kitêbên nû anîn fûarê. Kurd di warê xwendinê de tiral in, lê dîsa jî fûar baş derbas bû.
Li standa me zêdetir klasîkên kurdî hatin firotin. Dîwana Melayê Cizîrî, Mem û Zîn, dîsa pirtûka Feqiyê Teyran baş hat firotin.

Xwediyê Weşanên Ava Ronî War:
- Wekî em li bendê bûn çênebû. Me tiştên zêdetir ji Stenbolê hêvî dikir lê dîsa jî hema hema me mesrefê xwe derxist. Li cem me pirtûkên tirkî ji kurdî zêdetir hatin firotin. Ji nav yên kurdî jî "Gurzek Çîrok" zêde çû. "Bêlome" be me hindik anî bû, zû qediya. Dibe ku ji nav be jî, balkêş bû, heba wê hinek din jî jê bihata firotin.

Weşanên Aramê:
- Fûar baş derbas bû. Ji aliyê pirtûkên kurdî de pirtûkên me kêm bûn, em nikarin tiştek bibêjin. Lê pirtûkên Musa Anter me baş firotin.

Weşanên Deng:
- Çawa derbas bû? Em dikarin bibêjin teq û req bû. Beşdariya fûarê bes e. Ji pirtûkên me zêdetir Mem û Zîn a bi tirkî hate firotin. Dîsa ferheng jî baş hate firotin.

Weşanên Lîs:
- Em yekem car beşdarî fûara Stenbolê dibin. Di warê têkiliya bi xwendevanan re ji bo me baş bû. Hin pirtûkên ku em li bendê bûn ku dê pir bêne firotin nehatin firotin. Zêdetir Soneyên Shakespeare ku Kawa Nemir wergerandiye, dîsa Salnameya Kawa Nemir baş hat firotin. Ji bilî van pirtûka Mele Mehmûdê Bazîdî, Şivanê Kurmanca a Erebê Şemo baş hat firotin.

**

Nûçeyên eleqedar:

- Di roja dawîn a TUYAP'ê de bernameya weşanxaneyên kurd

- Welî: Ji bo pirsgirêka kurd Modela Gallerê guncan e

- Ji pencereya Valî "Komara Kurdistan"