Diyarname

Semedê lîgê fûtbolî ke semedê vîrusê korona hameybî betalkerdişî biryarê newey hamey girotişî. Hollanda û Tirkiya eyro biryarê xo day

Hollanda: Lîge bi temamî betal bî

Federasyonê Fûtbolî yê Kraliyetê Hollanda (KNVB) sedemê vîrusê korona lîgî daybî vindartişî, la enka qeybî betalkerdişî biryar da. KNVB'î serdemê lîgê 2019-2020'î betal kerd, nê şampiyon îlan kerd, nê zî qe tîm lîgra fîna. Serey 2020-2021 go bi heman tîman dest pa bikero.

Qeybî tîmê ke serey vernî ma go şorê Lîganê Ewropa jî vat ke gorey pûanên enkay ra go weçînê. Gorey ene joy ra lîder Ajaks û tîmo diyin AZ Alkmaar go şorê Lîganê Ewropa (play-off), tîmo hîriyin Feyenoord jî go şoro Lîgê Ewropa ay UEFA. Tîmo çarin PSV û yê pancihan Williem II jî go şorê play-offê Lîgê Ewropa.

Federasyonî vat ke ê bi UEFA şêwrayê û ana biryar giroto.

Serokwezîrê Hollanda Mark Rutte vat bî ke kay sporî zî tede heme çalakî semedê vîrusê korona heta 1'yê rezberî hamey taloqkerdin.

Tirkiya: Di aşmî dimara lîg dest pa keno

Qeybî lîganê Tirkiya eyro Serokê TFF'î Nihat Ozdemîr û Serokê Yekîtiya Kilûban Mehmet Sepil bi telekonferans xeberî day. Dimay xeberdanî Sepil qeybî çapemenî vat: "Enka ma fikirênê ke 12-13-14'ê hezîranî de maçanê Lîg û Kûpay Tirkiya bidê dest pa kerdinî. Hedef jî ew o 26'ê tîrmehî/temûzî de lîg temam bibo."

Sepilî vat ke belkî maçî bê temaşevan bêrê kaykerdişî la heme eynî bajar de nêbenê.