Enqere
Mebûsê BDP'ê yê Amedê Akin Birdal ji Wezarê Edaletê Sadullah Ergin pirsa "Qedexeya li ser Mem û Zîna ku Wezareta Çandê jî çap kir û belav kir hê didome yan na?"

Birdal pirsiyarnameyeke nivîskî da Serokatiya Meclisê, têde got ku Mem û Zîna Ehmedê Xanî bi kurdî-tirkî wezaretê jî çap kiriye û li mebûsan belav kiriye û wisa dom kir: "Qedexeya 3'yemîn DGM'ya Stenbolê ku di sala 1996'an de kiribû niha hê jî di Dadgehên Cezaya Giran de didome. Xizmên girtî Îbrahîm Eker ku di Girtîgeha Tîpa F ya Nimreya 2'yem a Sîncana Enqereyê de radizê jêre Mem û Zîn birine, lê ji ber ku qedexe bûye pirtûk nedane Eker. Îbrahîm Eker li hemberî biryara Dadgeriya Înfazê ya Enqereyê îtîraz kiriye. 2'yemîn Dadgeha Cezaya Giran a Enqereyê qedexeya pirtûk di cih de dîtiye û îtîraza girtî red kiriye."

Bîrdal paşê di pirsiyarnameya xwe de (26.01.2011) ev pirs ji Wezîrê Edaletê Sadullah Ergin kir:

- Mem û Zîna ku Wezareta Çand û Tûrîzmê jî çap kir û belav kir hê li ser qedexe heye?

- Ger qedexe didome (ku qedexeya li ser fikira raman û azadiya çaqemeniyê nayê qebûlkirin), Wezaret li ser belavkirina pirtûkçi difikire?

- Ger qedexe nadome, weşanên ku her kes jê sûde digire, girtî nikarin jê sûdê bigirin, ev yek ne cudakarî ye?

- Sedema ku Mem û Zîn wekî pirtûkek qedexe tê dîtin naveroka wê ye yan zimanê wê ye?