Li ser daxwaza hin nivîskar û hezkiriyên edebiyata kurdî em pirs û pirsgirêkên nivîskariya kurdî nîqaş dikin. Nîqaş ji bo her kesî vekiriye û her kesê bixwaze dê bikaribe bi nivîsa xwe, di rûpelên Diyarnameyê de fikr û ramanên xwe der bibe.
Ji bo naveroka nîqaşê em sînorekî danaynin, her kes dikare ji aliyê xwe ve, çi tiştê ku di weşangeriya kurdî de wekî pirsgirêk dibîne, an jî kêm dibîne nîqaş bike û balê bikişîne ser û ji bo çareserkirina pirsgirêkan jî pêşniyazên xwe bike…
Bi vê nîqaşê armanca me ew e ku em der barê pirs û pirsgirêkên nivîs û nivîskariya kurdî de fotografeke salên 2000’î derînin û diyarî rûpelên arşîva dîrokê bikin… Her wisa em hêvî dikin ku ev nîqaş di pêvajoya nivîskariya kurdî de bibe wesîleya pêşketinên nû.
Wekî destpêka nîqaşê me hin pirs diyar kirin û bi wan pirsan me bi çend nivîskaran re hevpeyvîn çêkirin. Hevpeyvînên ku me çêkirin em ê her rojê yekî, an jî diduyan pêşkêşî we xwendevanên Diyarnameyê bikin.
Her wisa em pirsên xwe li ser malperê jî diweşînin û kesên dixwazin bibersivînin dikarin pirsan daxin, bibersivînin û li me vegerînin. Ligel pirsên me, ku hebin pirsinên din her kes dikare li bal xwe li nivîsa xwe zêde bike û bibersivîne…
Ji xeynî kesên ku bi bersivên pirsan beşdarî nîqaşê bibin, kesên ku bixwazin dikarin bi gotarên xwe jî beşdarî nîqaşê bibin.
PIRSÊN JI BO NIVÎSKARAN
- Tu berhema/ên xwe di kîjan şert û mercan de diafirînî?
- Di dema afirandina berhemê de pirs û pirsgirêkên te yên sereke çi ne?
- Tu dikarî bi rehetî berhema xwe bidî çapkirin?
- Ku te dabe çapkirin, te bi weşanxaneyê re peymaneke çawa çêkiriye?
- Weşanger çi ji te xwest û çi da te ji bo çapkirinê?
- Te heqê telîfê stend an na?
- Ku te stendibe çi qas?
- Weşanxaneya ku pirtûka te çap kir, bi qasî ku heq dike qîmet da berhema te yan na?
- Berhem baş hate belavkirin yan na?(li cem hemû pirtûkfiroşên navendî peyda dibe yan na?)
- Bi têra xwe reklam hate çêkirin, weşanger ji bo danasandin û reklamê berpirsiyariya xwe bi cih anî yan na?
- Ji bo te qet şevên xwendinê yan jî 'roja îmzeyê' hate çêkirin?
- Bi te weşangerên kurd di warê edîtorî û redaksiyonê de berpirsiyariya xwe bi cih tînin an na? Heke tu bawer dikî bi cih naynin, tu dikarî çend mînakan bidî? Lazim e ku çi bikin, nakin?
- Tu bawer dikî sedema kêm firotina pirtûkên kurdî weşanger in?
- Ku xwendevan nebe pirtûk nayê firotin, pirtûk neyê firotin weşanger pere qezenc nake, weşanger qezenc neke pere nade nivîskar, weşanger pere nede nivîskar, nivîskar jî ji ber pirs û pirsgirêkên aborî bi têra xwe nikare ked û dema xwe bide nivîsê... Yanî bi kurtasî mesele wekî xelekên zincîrekê bi hev ve girêdayî ye... Ji bo çareserkirina pirsgirêkê divê çi bê kirin? Kê bike? Çawa bike?!!!
- Par 110'an zêdetir pirtûkên kurdî hatin çapkirin, gelo te ji van çend heb KIRÎN? Ku te nekirîbûn çima?
- Hejmara nivîskaran û berheman her diçe zêde dibe, lê hejmara xwendevanan zêde nabe, tu vê rewşê çawa dibînî?
- Bi te di roja me de, -dema ku em şert, derfet û realîteya welatê kurdan jî li ber çavan bigirin-, pirsgirêkên nivîsa kurdî yên herî sereke çi ne? (Yanî ji bilî pirsgirêkên mezin ên ji bêdewletiyê diqewimin…)
- Digel ku çareya pirsgirêkê siyasî ye, ji bilî aliyê siyasî yê têkildarî dewletan; gelo tiştên ku a niha nivîskar hem wekî şexs yek bi yek, hem jî bi giştî bi hev re, ji bo çareseriyê bikin hene yan na? Wekî mînak; di navbera nivîskaran de çêkirina yekitiyeke baş a ku nivîskarên çar parçeyan pê ve girêdayî (wekî konfederasyonekê, an jî PEN’ê) mimkûn e gelo? Hebûna yekitiyeke wiha ku ji hemû hêzên kurd serbixwe be gelo dê nikare roleke baş bilîze? Hem ji bo lidarxistina hin bernameyan, hem ji bo danasandin û piştgirîdayîna nivîskaran û gelek tiştên din…
- Par li Amedê Rojên Wêjeyê nehate lidarxistin; nivîskaran dengê xwe nekir. Yanî lidarxistina gelek çalakiyên wekî rojên wêjeyê û panel û semîneran maye ser daxwaza şaredar û siyasetmedaran, ma ev ne tişteke xelet e? Ku şaredar/siyaset qet neke!? (Ma nivîskar di nava xwe de nikarin saziyekê çêkin û karên wiha nehêlin li benda şaredariyan! Helbet dikarin ji hemû saziyên, komele, weqf, şaredarî, an jî hikumetan piştgirî bigirin wan bikin sponsor di hêla aborî de) Bi kurtasî ma ji destê nivîskaran tu tiştek nayê gelo?
- Wekî din hebin gotinên te fermo!....
Gotarên xwe bişînin ser mailên:
Silav û Rêz
Diyarname
.jpg)
