Diyarname
Siyasetmedar û nivîskar Kemal Burkay piştî 31 salan ku vegeriya Tirkiyeyê yek bi yek bi AKP'yiyan re hevdîtinan pêk tîne.

Burkay ku 30'yê tîrmehê vegeriya Tirkiyeyê pêşî cîgirê waliyê Stenbolê ew pêşwazî kir. Piştî ku Cîgerê Serokwezîr Bulent Arinç kêfxweşiya xwe ya ji bo hatina Burkay anî ziman, duh Wezîrê Yekîtiya Ewropayê yê AKP'ê û Sermuzakerekar Egemen Bagiş bi Burkay re hevdîtineke pêk anî. Burkay îro jî bi Wezîrê Çandê yê Tirkiyeyê yê AKP'ê Ertugrul Gunay re hevdîtin pêk anî.

Piştî hevdîtinê Gunay û Burkay li Holeta Taksim Hillê daxuyanî dan çapemeniyê. Li cihê daxuyaniyê Ala Tirkiyeyê û postera Ataturk hat daliqandin.

Gunay wisa got: "Burkay kesekî ye ku fikrên xwe bi dengek bilind tîne ziman. Loma di pêvajoya pêşiya me de cîhana me ya siyasî û fikrî jê li benda tiştên xweş e. Ez jêre serketinê dixwazim."

Burkay jî wisa got: "Ger bi rastî em ji vî welatî hez dikin, em ji gelê xwe hez dikin, divê em rêya bi hev re jiyînî û bi awayekî wekhev û di nav aştî jiyînê de bibînin. Bi awayekî din em nikarin xwe bigihînin aştî û jiyana hemdem. Gava girîng a vê yekê jî ew e ku çek bêne rawestandin. Emê vê çawa bikin ev mijareke din e. Bi rawestandina çekan em rêyek li ber diyalog û aştiyê vekin. Ji ber ku ev nebe em nikarin vê siûdê bi dest bişin. Ez dibêjim israra di şîdetê, di şer de ji bo welat ne tişteke baş e. Ji bo vê yekê divê em hewl bidin. Ez vegeriyam welatê xwe, ez gelek dilgeş im. Xebata min a ji niha û şûnde jî dê wisa be. Ez dikarim çiqas kedê lê xerc bikim ez wê nizanim."

Hate gotin ku Burkay piştî bernameya xwe ya li Stenbolê dê here Enqereyê û hevdîtinan pêk bîne. Lê li ser bernameya wî ya li Enqereyê hê tu agahî nehatine belavkirin.

***

Nûçeya eleqedar:

- Kemal Burkay vegeriya Tirkiyeyê