Diyarname

Van salan her ku diçe zêdeti gotinên pêşiyan têne berhevkirin û çapkirin. Niha yeka din çap bû ku gotinên pêşiyan ên Xorasanê ne. 

Pirtûka "Gotinên Pêşiyan Ji XOrasanê" ji aliyê Weşanên Wardozê ve hat weşandin û pirtûk ji aliyê Gulê Şadkam ve hatiye berhevkirin. Ji bo dîtine dor 2 hezar gotinên pêşiyan ên ji Xorasanê çavkaniyeke hêja ye.

Kurdên Xorasanê ji gotinên pêşiyan re dibêjin "Mesel". Amadekara pirtûkê Gulê Şadkam li ser vê yekê wisa nivîsiye, "Di karê xwe de 'mesel gerandin' û gava kesek meselekê bi kar tîne dibêje 'meselek xwe gerand'. Mesel, yek yan çend hevok in ku xelk di gotinên rojane de wekî şîret, agahî, qanûn û norm, bi kar tîne ku bikaribe mebesta xwe bi ronahî û kurtahî bigihîne. Mesel, berhema zanist û ezmûnên civakê ne."

Berhevkar Gulê Şadkam sala 2005'an ve dest bi vê xebatê kiriye. Wê demê dema carek diçe bajarê Aşxanê ku li bakurê Xorasanê ye ev fikir di serê wê de çêdibe û dest bi xebatê dike. Her berhev dike ku hejmara wan digihîje 2700'î lê paşê hinak jê dineqîne û pirtûkek ji 2 hezar gotinan jê pêk tîne.

Li gor nivîskar ragihandiye li Xorasanê çend devok hene û piranî ferqa wan di daçekan de ye. Nivîskar jî gotin li gor devoka wan nivîsandiye. Her wiha piştî her gotina pêşiyan şiroveya wê hatiye pêşkêş kirin. Di dawiya pirtûkê de jî ferhengokek ji peyvên kêm têne zanîn hatiye amadekirin.

Çend gotinên ji pirtûkê

Ji bo dîtina hin ji gotinên pêşiyan ên Xorasanê me çend tevî şiroveyên wan jê hilbijartin:

- Adem bixwe gûyê pelawxuran ne yê fitnexuran! ("fitnexur" di wateya parsek de)

Eger mirov dixwaze ku bikeve bin mineta kesekî, bila ew kes têr be, dara be.

- Berê yekê rû li mala yêkê ye!

Herî her derê jî gerek axir vegerî mala xwe

- Can nê dinê, mal tê dinê.

Tenduristî ji hemû tiştî girîntir e. Ew here nayê.

- Çav û çira, bav û bira!

Li ser qed û erzişa bav û birayan hatiye gotin. Bav û bira bi qîmet in.

- Derî xelkê lê mexin!

Azar megihînin xelkî, wan aciz nekin ku hûn jî aciz nebin.

- Gepan li pirîyê mexin!

Li ser tixtekî pir neaxivin bila dijwarî çênebe.

- Her çiqe dûr î, gul û nûr î!

Gava mirov ji hev dûr bin têkiliya wan baştir e.

- Kelê mirde sar e!

Gava kesek dimire, zû ji bîr dibe. Û xema wê/î xilas dibe.

- Mal qilêra destan e, geh dihere geh tê!

Carna mal bi destî tê, caran jî ji destî dere, mirov divê ku pir lê dil nede.

- Nanê mêran bê minet e!

Mirov baş gaa nan dide kesekî lê minet nake.

- Postê nîrî kes nake meşk!

Mirov divê karê bementiq neke.

- Serê bêeql kedîyê (di wateya "Kundir" de) wetal in.

Serê mirovê bêaqil wekî kundirê vala ye.

- Xew û mirin wekî hev in!

Xew wekî mirinê ye.

**

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye. 

***

REKLAM:

JI BO PROMOSYONÊ NAVNÎŞANEKE NÛ